Qazir qazaqstandyq blog salasy damýdyń bastapqy satysynda tur - Erlan Qarın
ALMATY. 19 naýryz. QazAqparat /Erlik Erjanuly/ - Eń belsendi blogerler - jýrnalıster. Bul týraly «Nur Otan» HDP-nyń hatshysy Erlan Qarın búgin Almatyda ótip jatqan qazaq blogerleriniń tuńǵysh quryltaıynda qazaq blogosferasyna sıpattama bergen kezde aıtty.
«Birinshiden, qazir qazaqstandyq blog salasy damýdyń bastapqy kezeńinde tur. Biz 104 blogqa saraptama jasaǵan bolatynbyz. Olardyń úshten biri sońǵy 2-3 aıda ashylǵan. Ekinshiden, blogtarda jeke sıpattaǵy máseleler, sonymen birge jalpy aqparattyq jobadaǵy basylymdar, onyń ishinde elderge jasaǵan saıahaty týraly, kúndelikti ómirde qajetti paıdaly keńester basym. Osy sıpattaǵy blogtar eń belsendi bolyp tabylady jáne jıi jańartylyp, adamdar kóp qarap, kóp túsinikter beredi. Úshinshiden, blog avtorlary kóteretin qoǵamdyq-saıası máseleleri oqyrmandardan ádette onsha qoldaý tappaıdy. Keıde tipti oqyrmandardyń pikirleri de bolmaıdy. Osydan qazaq tilindegi blogtardyń qoǵamdyq-saıası pikir almasý alańy bolmaǵandyǵyn túıindeýge bolady», - deıdi Erlan Tynymbaıuly.
Onyń aıtýynsha, qazaq blogy salasy qazaq jýrnalıstıkasy sekildi rýhanııat, mádenıet máselelerine baǵdarlanǵan. 10 jyl buryn qazaq jýrnalıstıkasy, qazaq baspasózi týraly dóńgelek ústel májilisine qatysýshylar basty aıyrmashylyq únemi dúnıetanymdyq máselelerdi kóterýge umytylady dep pikir túıindegen bolatyn. Sol úrdis qazaq blogynda da bar. Bul - qazaq jýrnalısteriniń yqpaly.
