Qazir ınternet zamany bolsa da, televızııa BAQ-tyń mańyzdy baǵyty bolyp qala beredi - N. Muhamedjanova

- Nurjan Jalaýqyzy, sizdiń «Qazaqstan» respýblıkalyq teleradıkorporatsııasyna basshylyqqa taǵaıyndalǵanyńyzǵa búgin týra 5 jyl tolypty. Elbasy Nursultan Nazarbaev ózińizge úlken senim artyp, osy salany basqarýdy senip tapsyrdy. 5 jyl az ýaqyt emes. Osy jyldar ishinde biraz aýqymdy sharýalar atqarylǵanyn kózi qyraǵy kórermen baıqap otyr. Ár jylǵy telemaýsym erekshelikterimen este qalady. Bıylǵy jyl da sol ádetinen tańbaıtyn sekildi. Onyń ústine sizder jazǵy maýsymda demalysqa ketpeı, kerisinshe, kórermenderińizdiń zeıinin ózderińizge qaratýdyń erekshe amal-tásilderin oılap tapqanǵa uqsaısyzdar. Eńbek demalysynyń ýaqyty bolǵanymen, kórermender de ádetinen jańylmaıdy ǵoı. Teleaqparat áli de mańyzdy...

- Iá, durys aıtasyz. Qazir ınternet zamany bolsa da, televızııa salasy BAQ arasynda mańyzdy baǵyttardyń biri bolyp qala beredi. Bulaı deýimniń sebebi, keıingi kezderi birqatar sarapshylar TV dáýiriniń aıaqtalyp kele jatqanyn alǵa tartýda. Meniń oıymsha, túrli mobıldi  gadjetter ómirimizge tereń engenine qaramastan, televızııa, radıo, tipti gazet te aqparat taratýda óz baǵyttarynan taımaq emes. BAQ fýnktsııalary keńeıe beredi.

Televızııa aqparat taratyp qana qoımaı, tanymdyq-aǵartý jumysyn qatar alyp júredi. Aqparat tarata otyryp, kóńil kóteredi, kún tártibindegi máselelerdi talqylaýǵa meılinshe kóbirek kórermen tartady. Qajet bolsa, tájirıbelik kómek te usyna alady. Mysaly, jańa ekonomıkalyq saıasattyń mańyzdy taqyryby - múlikti zańdastyrý nemese óz kásibin ashý úshin memlekettik sýbsıdııa alý múmkindikteri sala mamandarymen qosa, kórermenderdiń ózderiniń qatysýymen talqylanýda.

Bizdiń arnanyń shaǵyn jáne orta bıznesti qoldaý týraly «Tabys syry» atty  jobasy kórermenderge júzege asyrylyp jatqan reformalardyń negizin túsinýge, múmkindikterin baǵamdaýǵa múmkindik beredi. Tasy órge domalaǵan kásiporyndar tynysy týraly aqparat taratý arqyly biz kórermenge óz isin qalaı ashýǵa bolatynyn túsindiremiz. Bizdiń tilshiler jańa kásiporyndar, olardyń damý joldary, shyǵaratyn ónimderi, qyzmet etetin adamdar, olardyń maqsattary týraly ondaǵan sıýjet daıyndady.

Árıne, áli de bolsa sheshimin tappaǵan túrli máseleler, syndar da eleýsiz qalmaıdy. Alaıda, biz, eń qıyn kezeńnen de shyǵýdyń joly bar ekenin  aıtyp, durys oılaýdy úıretemiz, telekórermenderge qol ushyn berip,  yntalandyrýǵa tyrysamyz. Kórermendermen birge qýanyp, birge ýaıymdaımyz. Biz barynsha kóńil-kúıi kóterińki telekontent jasaýǵa tyrysamyz. Jańalyqtar, tok-shoý, derekti fılmder sııaqty barlyq jobalarymyz dál osy maqsattarǵa baǵyttalǵan. Endi eki jyldan soń Ulttyq arna 60 jyldyq mereıtoıyn atap ótedi. 2011 jyldan bastap, «Qazaqstan» Ulttyq telearnasy júz paıyz qazaq tilinde habar taratyp kele jatqanyn bilesiz. Telearnanyń baǵdarlamalyq saıasaty ótken jyldardaǵy efır taratý dástúrin saqtap, óziniń sapaly jobalaryn shyǵarýdy maqsat tutqan. Bizdiń shyǵarmashylyq-tehnıkalyq top kásibı deńgeıin únemi arttyra otyryp, teleındýstrııanyń álemdik naryǵyndaǵy jańashyldyqty ıgerýdi árkez nazarda ustaıdy.

Elbasymyz Nursultan Nazarbaevtyń únemi qoldaýynyń arqasynda  teleradıokorporatsııa ózge de memlekettik BAQ-pen birge sońǵy 5 jylda zamanaýı jabdyqtalǵan «Qazmedıa ortalyǵy» ǵımaratynda jumys istep keledi. Tehnologııa, aqparat berý formatynyń ártúrliligi, grafıkalyq bezendirý únemi jetildirilip otyrady. Bul jaıttardyń barlyǵy  televızııalyq «ádetterdiń» qalyptasýyna tikeleı áser etedi. Biz kórermenge qajetpiz, bizge qyzyǵatyn óz aýdıtorııamyz bar. Sol qýantady.

 - «Qazaqstan» ózin ámbebap arna retinde kórsetýde. Bul uǵymdy qalaı túsinýge bolady?

- Biz ártúrli janrdaǵy ónim usynamyz: aqparattyq, saraptamalyq, áleýmettik-ekonomıkalyq, tanymdyq, oıyn-saýyqtyq, mádenı, tarıhı, bıznes-jobalar. Jalpy adamzattyq qundylyqtardyń, etnıkaaralyq kelisimderdiń qalyptasýyna, jastar tárbıesi, Elbasy usynǵan «Máńgilik El» ulttyq ıdeıasyn nasıhattaýǵa óz úlesimizdi qostyq. Bizge ulty ózge bolsa da, árbir qazaqstandyqtyń bizdiń ónimdi túsinip, qabyldaǵany mańyzdy.

Biz otandyq telehabar taratýshylar arasynda alǵash bolyp qoǵamdyq mańyzdy baǵdarlamalar, derekti fılmder, telehıkaıalar jáne basqa da kórermen nazarynan tys qalmaıtyn tól ónimderimizdi orys tiline sýbtıtr arqyly aýdarýdy qolǵa aldyq. Stýdııalarda qazaq tilinde ǵana emes, sonymen qatar, orys jáne aǵylshyn tilderinde erkin sóıleı alatyn kásibı jýrnalıst- ıntervıýerler qyzmet etedi.

- Sizder kimge habar taratasyzdar? Kórermenderińiz kim?

- Bizdiń kórermender - ózin de, elimizdi de damytyp, ilgeriletkisi keletin, pozıtıvti oılaıtyn adamdar. Biz respýblıkamyzdyń barlyq aımaǵyndaǵy 100 myńnan astam aýdıtorııaǵa habar taratamyz. Ásirese, «Qazaqstandy» 15 pen 45 jas aralyǵyndaǵy kórermender kóredi. Zertteýler boıynsha, kórermenderdiń ortasha jasy - 32. Áıtse de, árbir qazaqstandyq bizdiń baǵdarlamalar kestesinen keregin alsa eken deımiz.

- Kórermender nazaryn qalaı aýdarýǵa bolady?

- Jańa formattar izdeý kerek, baǵdarlamalardyń mán-mazmunyn jetildirý qajet. Biz kórermenderdi sapaly kontentke úırettik. Bizden sony talap etedi. Kórermenniń tek aqparattyq baǵdarlamalardy kórip qana emes, onyń bir múshesi bolǵanyn qalaımyz.

Bizdiń jýrnalısterdi aýyl-aımaqtardan halyq kórse, olardy tanyp, alǵys aıtyp jatady. Sol úshin qýanamyz.  Elimizdegi beıbitshilik pen kelisim úshin qyzmet etip jatyrmyz. Halyqtyń yqylasyna bólený - eńbegimizdiń aqtalǵany dep bilemin.

Aıta keteıik, korporatsııanyń kaztrk.kz portaly onlaın-rejımde habar taratady. Kórermender baǵdarlamalardyń ótken sandaryn, telehıkaıalardy kez kelgen ýaqytta tamashalaı alady. Olar da aýdıtorııamyzdy «ustap qalýǵa» kómektesedi.

- «Qazaqstan» Ulttyq telearnasynyń qaı baǵdarlamasyn kórýge keńes beresiz?

- Mıllıondaǵan qazaqstandyqtardyń kóńilinen shyqqan TOP baǵdarlamalar bar. Ótken TV-maýsymynan beri bizdiń aqparattar «KazNews» ataýymen efırge shyǵyp júr. Kúnniń basty oqıǵalaryn barlyq telearnalardan birinshi bolyp qorytyndylaımyz. Aqparattardyń berilý formaty men olardy grafıkalyq árleýdiń arqasynda bizdiń jańalyqtar odan ári sapaly, qyzyqty bola tústi.

Ulttyq arnanyń 85 paıyz baǵdarlamasy - ózimizdiki. Kóptegen jobalarymyz tanymal boldy. «Túngi stýdııada Nurlan Qoıanbaev» tok-shoýy - reıtıngisi eń joǵary jobalarymyzdyń biri. Stýdııa qonaqtary - óner juldyzdary, sport sheberleri, medıtsına, ǵylym salasynyń ókilderi kórermendermen óz jetistikteriniń qupııasymen bólisti. Áli de bólise bermek.

Sondaı-aq, «Birge tańdaımyz!», «Áıel baqyty» baǵdarlamalary da - joǵary reıtıngti. Láılá Sultanqyzy júrgizetin «Áıel baqyty» jobasynyń tanymal bolǵany sonsha - efır ýaqytyn 40 mınýttan 2 saǵatqa uzarttyq.

- Kópshilik suranysyndaǵy bul jobalar ne týraly?

- «Áıel baqyty» uǵymy neni bildiredi? Eger áıel baqytty bolsa, onyń balalary, ata-anasy, otbasy da baqytty. Áıel baqytty bolǵan jaǵdaıda, bizdiń qoǵam da baqytty bolatynyna senimdimin. Jobanyń máni jalpyadamdyq qundylyqtar, balalardy tárbıeleý, olardyń bolashaǵyn tańdaý, úshtildilikti engizý, densaýlyq, mádenıet, sport jáne tek áıel úshin emes, bárine de qyzyqty basqa da máseleler.

«Birge tańdaımyz!» jobasynda biz kórermendermen birge salaýatty ómir saltyn tańdaımyz, durys tamaqtaný, kitap oqý. Birge ádemi zattar tigemiz, toqımyz jáne úlgisin jasaımyz. Tańdalǵan taqyryptar tanymal bolǵandyqtan, ol jobalar áleýmettik jeliler arqyly talqylanady. Murat Ábenovpen ótetin qoǵamdyq-saıası «Serpilis» tok-shoýy, Dana Nurjigittiń áleýmettik-dramalyq «Dara jol» sekildi apta saıynǵy jobalary aýdıtorııaǵa keńinen tanymal.

«Búgingi kúnniń batyrlary» baǵdarlamasynyń keıipkerleri - basqalar úshin úlgi bolatyn adamdar. Bireýleri syrqatyn jeńdi, bireýi óziniń ómirin táýekel etip, basqanyń ómirin qutqardy,  bireýleri ony kúnde iske asyrady. Sebebi onyń kásibi - dáriger. Jetimge ata-ana bolý, týǵan aýylyna járdemdesý. Mysaldar kóp jáne de qazaqstandyqtar olar týraly bilýleri tıis.

Sheteldikter asyrap alǵan qazaqstandyq balalardyń taǵdyry týraly «Sheteldegi qazaq balalary» syndy biregeı jobamyz týraly aıtýǵa bolady. «Senbilik tańda» Gúlmıra Daırabaı úlken otbasylyq dastarhanda elimizdiń áıgili adamdarymen kezdesedi.

Qazaqstan - kópultty memleket. Kez kelgen ult mádenıetiniń mańyzdy elementi - ulttyq taǵam bolyp tabylady. «As bolsyn» - bul tek retsepter men taǵamdar emes, elimizdegi ulttardyń tarıhy, folklory, salt-dástúri týraly sóz bolatyn «telesaıahattanýshylar klýby».

Jýyrda usynylatyn «MýzART Live» megajobasy otandyq jańa talanttardy izdeıdi. Mýzykalyq baıqaýdyń úshinshi týryna 60 (16-dan 25 jasqa deıingi) vokalshy ótti, fınalǵa 6 ónerpaz tańdalady. Barlyq ánder memlekettik tilde oryndalady. Al, kóktemde qazaqstandyq estradanyń barlyq juldyzdary jandy daýyspen oryndaıtyn «Sálem, Qazaqstan!» apta saıynǵy Live-jobasy kórermenderge jol tartty.

- Teleradıokorporatsııa jáne Qazaqstan halqy Assambleıasy uıymdastyrǵan «Shyn júrekten» qaıyrymdylyq telemarafony qoǵamdaǵy eleýli oqıǵalardyń birine aınaldy....

- Ol sáýirdiń aıaǵynda ótti. Áýeli biz ony bir kún ishinde ótkizýdi josparlaǵan edik, alaıda, kórermender men qatysýshylardyń oń pikirin eskerip, úsh kúnge uzartýǵa sheshim qabyldadyq. Aýdandarda qıyn jaǵdaıǵa tap bolǵan, aýyr syrqaty bar, qoǵamnyń materıaldyq jáne moraldyq kómegine muqtaj  otbasylar týraly sıýjetter daıyndaǵan tilshilermen tikeleı qosylýlar boldy. Astana, Almaty, Taraz, Atyraý jáne Qaraǵandy stýdııalaryna memlekettik jáne qoǵam qaıratkerleri, depýtattar, BAQ, qaıyrymdylyq uıymdarynyń ókilderi, sportshylar keldi. «Qazaqstan halqy Assambleıasy» QQ 30 mıllıon teńge aýdaryldy, sonymen qatar, 15 mıllıon teńge mólsherinde qyzmetter men taýarlar túrinde kómek kórsetildi. Bizge myńdaǵan ótinishter, 861 telefon qońyraýy kelip tústi, áleýmettik jelilerge kelip túsken hattar boıynsha 300-den astam jarııalanym jasaldy. Osyndaı telemarafondardy dástúrli túrde ótkizý týraly sheshim qabyldandy.

- Nurjan Jalaýqyzy, alda usynar qandaı jobalaryńyz bar?

- 11 shildeden bastap «Qazaqstan» arnasy óz kórermenderine «Uly dala balasy» atty jańa realıtı-shoýdy usynady. Joba Qazaqstan Táýelsizdiginiń 25 jyldyǵyna oraılastyrylǵan. Sonymen qatar, basty maqsat - keıde bizge jetispeıtin adamdyq qundylyqtardy dáriptep, nasıhattaý. Bul degenińiz - jaqynyńa janyń ashý, muqtajdarǵa qol ushyn berý, aýqatsyz adamdarǵa qaıyrymdylyq kómek kórsetý.

Túsirilimdi elimizdiń toǵyz qalasynda júrgizý josparlanyp otyr. Tanymal qazaqstandyq ánshi Tóreǵalı Tóreálimen óńirlerge «Qazaqstan» telearnasynyń juldyzdary da barady.

Al, «Arnanyń betke ustarlary» jobasy telekórermenderge respýblıka aımaqtarynyń jetistikteri men erekshelikteri týraly aıtyp berdi. Bul óńirlerdiń ózindik beınetanystyrylymy boldy. Kúzde «Qazaqstan» telearnasynan «Kórkem fılmmen» birlesip túsirilgen júz serııalyq «Aıman - Sholpan» telehıkaıasyn kútińizder. Onyń ıdeıasy qazaq ulttyq lıro-epostyq poemasynan alynǵan. Serıalda egiz qyzdyń taǵdyry týraly baıandalady. Aıta ketsek, olardy bir aktrısa - Saltanat Baqaeva somdaıdy.

-Keıde kórermender telearnany ótip jatqan serıaldarynan birden tanyp jatady. Siz «Qazaqstan» Ulttyq telearnasy efırinen sheteldik teleónimder qysqartylyp, otandyq serıaldar úlesiniń artqandyǵyn birneshe ret  atap óttińiz...

-2013 jyldan bastap «Qazaqstan» telearnasy otandyq serıaldardy, óz ónimderimizdi damytyp keledi. Qazaqstandyqtar ekrannan zamanaýı, sheteldik ónimderdi kórgenimen, óz mádenıetimiz ben tarıhymyzǵa, salt-dástúrimizge degen qyzyǵýshylyqtary zor. Búginde otandyq serıaldarǵa kórermenderdiń suranysy joǵary bolǵandyqtan, bizdiń arna atalmysh aýdıtorııaǵa birden jaýap qatýǵa tyrysady. Otandyq serıaldardyń reıtıngi sheteldik serıaldardan kem emestigi qýantady.

Biz otandyq serıaldardyń sapasyn jaqsartý úshin jańa ıdeıalardy damytyp, túsirilim jumystaryn, stsenarıı, sınopsıs, montajdy qadaǵalap,  túsirilgen kadrlardy tekserý jumystaryn júrgizemiz.

Kórermenderge «Syrǵalym», 100 serııaly «Qara shańyraq», «Kók tarlandary», «Jedel járdem», «Dostar» serıaldary unady. Olardaǵy  basty keıipkerdiń biri muǵalim («Ustaz»), biri polıtsııa qyzmetkeri («Aýyl saqshysy»), biri dáriger («Jedel járdem») boldy.

«Qazaqstan» teleradıokorporatsııasynyń tapsyrysy boıynsha Dastan MEDIA kınokompanııasy 12 bólimnen turatyn «Jańa qonys» serıalyn túsirdi. Onda aýyl men qalanyń jandanýy, aýyldyq jastardyń qala ómirine beıimdelýi, týǵan jerge degen saǵynysh, qazaq qoǵamynyń damýy qamtylǵan. Al, «Jaryq» serıalynyń túsirý jumystary Moınaq sý elektr stantsııasy mańynda  júrgizilgen. Bul serıalda  Qazaqstannyń eń kórikti jerleriniń biri - Sharyn shatqaly, Sharyn ózeni kórsetiledi.

- Demek, sizder serıaldardyń basty keıipkeri retinde ár salanyń mamandaryn qoıyp, qoǵam ómirine jaqsy jaǵynan áser etýge tyrysasyzdar.

- Iá, dál solaı. Mysaly, «Bizdiń aǵaı» serıaly aýyl aqsaqalynyń qyzyqty oqıǵalarymen baılanysty. Aqsaqal zeınetke shyǵysymen jastardyń tálimgeri bolady. «Tańdaý» serıaly - IT-tehnologııasy týraly, ıaǵnı, elimizde óz kásibińdi damytý úshin barlyq jaǵdaı jasalǵandyǵy qamtylady. «Aıaýly arman» serıaly -  úlken ómirge qadam basqan balalar úıiniń túlekteri týraly bolsa, «Sýdaǵy iz» - bir aýylda týyp-ósken úsh dostyń ómiri týrasynda. Sonymen qatar, «Shyrǵalań» kópserıaly detektıvi,  «Іńkár júrek» melodramasy kórsetildi. Aıta ketetin bir jaıt, kórermenderimizdiń arasynda júrgizilgen saýalnama qorytyndysy boıynsha «Syrǵalym» teleserıaly 2014 jyldyń úzdik serıaly retinde tanylyp, «Tatarstan - Novyı vek» (Rossııa) telekanalyna satyldy. Osy telenovellany 21 maýsymnan bastap «31» arna kórsete bastady. Bul biz úshin qýantarlyq habar.

- «Qazmedıa ortalyǵynda» Jambyl Jabaevtyń 170 jyldyǵyna arnalǵan «Jambyl» tarıhı dramasynyń tusaýkeseri ótkeni esimizde...

- Kórermender fılm arqyly Jambyl Jabaevtyń ómiri, qaıratkerligi týrasynda, sol kezdegi Jambyl dáýirinen habardar boldy. Aıta ketý kerek, fılm rekvızıtteri retinde túsirilim kezinde aqynnyń jeke zattary men jıhazdary, ZIM-1 avtokóligi qoldanylǵan. Tarıhı drama kórermenderdiń kóńilinen shyqty. Álbette, «Qazaqstan» Ulttyq telearnasy aldaǵy ýaqytta da otandyq serıaldardyń  odan ary damýyn qolǵa alady.

- Byltyrǵy jazda telearna reıtıngtik telehıkaıalarynyń biri - «Kelin» úndi fılminiń aıaqtalatynyn jarııalady. Kórermender 1500-ge jýyq bólimin kórip shyǵyp, onyń jalǵasyn tamashalaǵylary keletinin jetkizdi...

- Úndi telehıkaıasyna úmit artyp, biz Koreıa men Túrkııa shyǵaratyn fılmderden bas tarttyq. Shynynda da, qatelesken joqpyz. Ondaǵan jyldar buryn da halqymyz úndi fılmderin súıispenshilikpen qaraǵan. Sonymen qatar, eki eldiń mentalıtetterinde, dástúrlerinde uqsastyqtar bar. Ol: otbasylyq qundylyqtar men úlkenderdi syılaý, er adam men áıel arasyndaǵy qarym-qatynas. Búkil Qazaqstan boıynsha osy telehıkaıanyń kórermenderi bizdiń redaktsııanyń VKontakte, Facebook, Twitter, Instagram áleýmettik jelileri arqyly qanshama hat joldady. Orystildi kórermenderimiz telehıkaıa qazaq tilin úırenýge yntalandyrǵany týraly oılaryn bildirdi. Telehıkaıanyń úlkender men balalarǵa da unaıtynyn sodan bildik. Árıne, kórermeńderimizdiń ótinishterin oryndaý maqsatynda «Kelin» telehıkaıasyn qaıta kórsetýdi bastadyq.

Sonymen qatar, «Qyzyl saraıdaǵy tús» atty arnamyzdaǵy tuńǵysh Qytaı telehıkaıasynyń reıtıngi de jaqsy bolǵanyn atap ótkim keledi. Bul - Qytaı tarıhyndaǵy tanymal  telenovellalardyń biri. Kórermenderdi Tsın áýleti kezindegi qyzyqty dáýirimen tanystyrady. Qazirgi tańda telebaıqaýlar men festıvalderdiń júldelerin alǵan «Júregim sizge amanat» atty fılıppındik telehıkaıa kórsetilim de sátti iske asyp keledi. 

- «Qazaqstan» RTRK dýblıaj stýdııalarynda Walt Disney kompanııasynyń shyǵarmalarymen jumys atqarylyp jatqanyn bilemiz....

- Bizdiń yntymaqtastyǵymyz 2012 jyly bastalǵan. Osy jyldar aralyǵynda Ulttyq arnanyń efırinde «Zolýshka» men «Belosnejka» sııaqty álemdik anımatsııanyń klassıkasy jáne «Ýnıversıtet monstrov», «V poıskah Nemo» atty mýlfılmderdiń keıipkerleri qazaq tilinde sóıledi. 

Jýyrda Vetnamnyń eń iri medıa qurylymy VTV Ortalyq telearnasymen bas kelisimhatqa qol qoıyldy. Eki eldiń mádenıeti men dástúrlerin kórkem jáne derekti fılmder, oıyn-saýyq, tanymdyq baǵdarlamalar arqyly jarııa etý  maqsatynda kelisimsharttar jasaldy.

- Fýtboldan Eýropa chempıonatyna álem boıynsha mıllıondaǵan kórermenniń nazary aýyp otyr...

- ÝEFA ekran aldyna 4 mıllıardqa jýyq kórermen tartady. Qazaqstandyqtar chempıonattan tolyqtaı 51 match kóre alady: 36-y  «Qazaqstan» telearnasynan, 15-i - «Kazsport» arnasynda.

Esterińizge sala keteıin, «Kazsport» kórermenderi Lıllehammerde ótken jasóspirimder arasyndaǵy qysqy Olımpıada oıyndaryn, 2016 jylǵy bokstan áıelder arasyndaǵy Álem chempıonatyn tamashalaı aldy. Sonymen qatar, «Qazaqstan»  dzıýdodan Álem chempıonatyn kórsetýdiń eksklıýzıvti quqyǵyna ıe boldy. Halyq nazaryn aýdaratyn osyndaı sporttyq translıatsııalar joǵary reıtıng beredi. 

«Qazaqstan» jáne Kazsport telearnalary álemdik deńgeıdegi is-sharalardy árkez tikeleı kórsetýge tyrysady. 1 shildede 3 jyldyǵyn atap ótken «Kazsport» telearnasy 2017 jyly Almaty qalasynda ótetin Búkilálemdik Qysqy ýnıversıada oıyndaryn jáne basqa da sporttyq sharalardy kórsetýdi josparlap otyr.

Sonymen qatar, Gennadıı Golovkınniń kezdesýlerin tikeleı efırde kórsetý «Qazaqstan» arnasynyń jarqyn dástúrine aınaldy. Onyń Lememen ótkizgen jekpe-jegi barlyǵymyzdy tańǵaldyrdy. Kórermender sany boıynsha absolıýttik rekord anyqtalǵan: «Qazaqstan» kórermenderi ishinen 3,5 mıllıon adam Gennadııge jankúıer bolǵan. Al, 1 mıllıon adam jekpe-jekti korporatsııanyń kaztrk.kz saıty arqyly tamashalaǵan.

Sondaı-aq, ataqty jerlesimiz - Qanat Islamnyń kásibı mansabyn árdaıym nazarda ustap otyramyz. Roman Jaılaýov, Isa Aqberbaev, Janat Jakııanov syndy sportshylarymyzdyń da kezdesýlerin usynyp kelemiz.

- Kúzde elimizdiń basty radıosy - Qazaq radıosyna 95 jyl tolady. Sol jóninde aıtsańyz..

- Qazaq radıosy áýe tolqynyna táýlik boıy taraıdy. Baǵdarlamalar efırge 8 tilde shyǵady: qazaq, orys, nemis, koreı, uıǵyr, ázirbaıjan, túrik, tatar. Respýblıkadaǵy tek qana qazaq tilinde taralatyn jalǵyz radıo «Shalqar» radıosy da tyńdarmandarymen 50 jyl boıy birge kele jatyr. 2011 jyldan beri álemniń kez kelgen núktesinen ǵalamtor arqyly FM formatynda onlaın qosylý múmkindigi bar.

Maýsym aıynda eń jas «Classic» radıocy 5 jyldyǵyn atap ótti. Ony Almaty, Astana, Aqtaý turǵyndary tyńdaı alady. «Classic» sheteldik tanymal radıostantsııalarmen birlestikte. Ásirese, BR-klassik (Mıýnhen), «Orfeı» (Máskeý)  BBC 3-pen (London) yntymaqtastyǵy nátıjeli bolyp keledi. 5 jylda áýe tolqynyna kóptegen jobalar men «Kýltýrnaıa mozaıka», «Kınoblıýz», «Tylsym perne» sııaqty  avtorlyq baǵdarlamalar shyqty.

- Nurjan Jalaýqyzy, ótken aptada Baılanys jáne aqparat qyzmetkerleriniń kásibı merekesi atalyp ótildi. Osyǵan oraı Korporatsııa qyzmetkerlerine, jalpy, otandyq jýrnalısterge aıtaryńyz...

- Korporatsııadaǵy tamasha kásibı komanda bizge barlyq ıdeıalarymyzdy júzege asyrýǵa, tabysty baǵdarlama saıasatyn qurýǵa jáne kórermenderimizdi árkez menshikti ónimderimizben qýantýǵa múmkindik beredi. «Qazaqstan» telearnasynyń ujymy - shyǵarmashyl, izdenimpaz. Árdaıym qosymsha bilim alýǵa talpynyp júredi. «Bolashaq» baǵdarlamasy boıynsha oqyp jatqan qyzmetkerlerimiz bar. Kópshiligi aǵylshyn tilin jetik meńgerýde. Qyzmetkerlerimizdiń biliktiligin jetildirip otyrýǵa, kadrlardy jumys barysynda almastyryp otyrýǵa basa nazar aýdaramyz.

Aımaqtaǵy qyzmetkerlerimizdi yntalandyrý maqsatynda bıyl tuńǵysh ret saıt arqyly «Arnanyń betke ustarlary» baıqaýyn uıymdastyrdyq. Ár aımaqtan eki qatysýshy - barlyǵy 24 úmitker Gran-prı jáne І,ІІ,ІІІ oryndar úshin baq synady. Biz úshin jergilikti jerlerdegi telejúrgizýshilerdiń tanymaldylyǵyn, kásibı qasıetteri men qyzmette kóterilý deńgeılerin baǵalaý mańyzdy boldy. Aımaqtardaǵy úzdik qyzmetkerler bolashaqta Astanaǵa - ortalyq televıdenıege qyzmetke shaqyrylýy ábden múmkin.

Jýrnalıst árqashan oqıǵa ortasynda júredi. Sondyqtan, BAQ salasynda qyzmet etetinderden jaýaptylyq, bilimge qumarlyq, sonymen qatar, zamanǵa saı kreatıvtilik talap etiledi. Ústirttilikten aýlaq bolýy úshin berip otyrǵan taqyrybyn jetik meńgerýi tıis. Sondaı-aq, jýrnalıst sózge abaı bolýy kerek. Qyzmettegi tildiń mańyzdylyǵyn umytpaý qajet. Búginde elimizde jıi aıtylyp júrgen úshtildiliktiń de BAQ salasy qyzmetkerleri  úshin mańyzy zor.

Jalpy,  jýrnalıstıka adamdardyń ómirin jaqsartýǵa qyzmet etýi kerek.

Bizdiń kishkentaı eńbegimizdiń ár jaǵynda úlken tarıh, adam taǵdyry jatyr. Kórermenderimiz, tyńdarmandarymyz jáne oqyrmandarymyzben birge ómirdiń ár sátine qýanyp júreıik.