Qazir estrada salasy tanymaldyqtyń eń ońaı joly bolyp bara jatyr - Tileýles Qurmanǵalıev
ALMATY. 18 aqpan. QazAqparat - Óner joly qıyn da kúrdeli. Bul jaıly keshe Almatyda ótken ánshi Tileýles Qurmanǵalıevtiń «Oıqaraǵaı» dep atalatyn alǵashqy án jınaǵynyń tusaýkeser keshinde aıtyldy.
"Qazir tanymaldyqtyń eń ońaı joly estrada salasy bolyp bara jatyr. Áý dep án aıtqannyń bári daýys yrǵaǵy kelse boldy úlken sahnaǵa shyǵýǵa umtylady. Kóp jaǵdaıda halyq ónerin arqalap júrgen dástúrli ánshilerimiz jeke kesh ótkizýge nemese jınaq shyǵarýǵa qoldary tıe bermeıdi. Óıtkeni bul salada áli ıgerilmeı jatqan jáne aınalymǵa túspegen halyq murasy óte kóp», - deıdi T. Qurmanǵalıev. Búgingi tańda ol ózi bilim alǵan Qazaqtyń Qurmanǵazy atyndaǵy ulttyq konservatorııasynda ustazdyq etip, shákirt tárbıelep júr. Qoly qalt etse el aralap, umytylyp bara jatqan halyq ánderi men aqyndarynyń murasyn jınaýdy ádetke aınaldyrǵan onyń qorynda 400-ge jýyq án jınaqtalǵan. «Kóbine halyq ánderin oryndaımyn. Dástúrli án ónerindegi Jetisý men Arqa mektepterin tolyq meńgerdim de aıta alamyn. Ony kásibı túrde oqyp, úırendim. Bul jınaqqa qalyq jurtshylyq áli estimegen «Aq jaıla», «Aǵajaı porym» «Jeken jar» sııaqty kóptegen halyq ánderi men halyq sazgerleriniń ónersúıer qaýymnyń nazarynan tys qalǵan birqatar týnydylary enip otyr. Máselen «Aq jaılany» aıtystyń aqtańgeri atanǵan Orazaly Dosbosynovtan úırengenmin. Al endi bireýlerin kónekóz qarııalarymyzdan izdep baryp úırendim», - deıdi Tileýles Qurmanǵalıev.
