Qazir elimizde dinı kitapshalar taratatyndardyń sany azaıǵan
ASTANA. QazAqparat - Dinı ádebıetterdi nasıhattaý áreketteri zańǵa qaıshy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Din isteri agenttiginiń tóraǵasy Marat Ázilhanov málim etti.
Dinı ádebıetter men únparaqtar taratý máselesine toqtalǵan ol, «Qaýyrt jelige» osy másele turǵysynda saýaldar jıi túsip jatady. Jalpylaı aıtqanda, qazir elimizde, ıaǵnı qala kóshelerinde kitapshalar taratatyndardyń sany azaıǵan. Bul zańnamamyzdyń nátıjesi dep bilemiz», - dedi.
Osy oraıda agenttik basshysy kóshede júrip dinı kitap taratyp, jurtqa jarmasyp dinı ádebıetterdi nasıhattaý áreketteri zańǵa qaıshy keletinin atap ótti.
«Bundaı azamattarǵa Ákimshilik kodekste jaza da qarastyrylǵan. Sondyqtan eger dinı mazmundaǵy únparaqtar tyqpalap jatsa, bul zańsyz áreketti quqyq qorǵaý organdaryna habarlaý kerek», - dep túıdi ol.
