Qazir álemde klassıkalyq týyndylardy zaman talabyna saı qaıta qaraý úderisi júrip jatyr - Muhtar Qul-Muhammed
ALMATY. Maýsymnyń 7-si. QazAqparat /Erlik Erjanuly/ - Ádepten ozbaıtyn, júrekten qozǵaıtyn, jastardyń da, aǵa býynnyń da kóńilin tabatyn jáne repertýardan uzaq ýaqyt oryn alatyn tamasha shyǵarma dúnıege kelipti.
Mádenıet mınıstri Muhtar Qul-Muhammed senbi kúni Almatydaǵy Qazaqtyń Ǵ. Músirepov atyndaǵy akademııalyq balalar men jasóspirimder teatrynda Shyńǵys Aıtmatovtyń "Qyzyl oramaldy Shynarym" qoıylymynyń premerasynan keıin osylaı aıtty, dep habarlaıdy QazAqparat.
"Qazir álemdegi klassıkalyq týyndylardy zaman talabyna saı qaıta qaraý úderisi júrip jatyr. Biz odan ózimizdiń zamanymyzdy, adamdardyń qaqtyǵysyn, obrazdar júıesin izdeımiz. Ár rejısser kez kelgen shyǵarmany ózinshe qarap, ózinshe qoıýǵa qaqysy bar. Biraq ol kóp jaǵdaıda dál búgingideı avtordyń oıymen de, kórermenniń oıymen de úılesip jata bermeıdi. Búgin sondaı úılesimdilik bar dep esepteımin. Qyrǵyzstandaǵy oqıǵa saıabyrsyp, ornyna kelgennen keıin qyrkúıek-qazan aılarynda Bishkekke baryp jarqyratyp qoıyp qaıtsańyzdar, qyrǵyz aǵaıyndar dán rıza bolady dep oılaımyn. Qarajatyn da ózim taýyp, mınıstrmen de kelisemin", deıdi Muhtar Abraruly. Mádenıet mınıstriniń aıtýynsha, qazir ol barlyq teatrlarǵa baryp jumystarymen jan-jaqty tanysyp júr. Byltyr Abaı men Baıseıitova atyndaǵy opera teatrlaryna 150 mıllıonnan, Áýezov pen Lermontov atyndaǵy drama teatrlaryna 100 mıllıonnan, al Músirepov pen Sats atyndaǵy jastar teatrlaryna 50 mıllıon teńgeden qosymsha qarjy bólingen edi. Sonyń arqasynda qazir olarda jańa qoıylymdar júzege asyp jatyr.
