Kazınoǵa mıllıondap aqsha utylǵan memqyzmetshilerdiń qarajatty qaıdan alǵany zerttelip jatyr
«Osymen úshinshi apta boldy, áleýmettik jelide 305 memlekettik qyzmetshiniń kazınoǵa baryp, 507 mln teńge shyǵyndaǵany týraly Almaty oblystyq prokýratýrasynyń qorytyndy qujaty tarap jatyr. Bul aqshany atalǵan memlekettik qyzmetshiler qaıdan alǵanyn Bas prokýratýra teksere me?», - dep surady BAQ ókili.
Bas prokýror orynbasarynyń málimeti boıynsha, qazir atalǵan tulǵalardyń jumys orny ár fakti boınysha tekserý júrgizip jatyr.
«Buǵan deıin de aıtqan bolatynmyn. Osyǵan deıin áleýmettik jelide aqparat taraǵan edi. Ár fakti boıynsha qyzmetkerleri osy hatta fıgýrant bolǵan memlekettik organdar tekserý júrgizip jatyr. Onyń ishinde siz kóterip otyrǵan suraq ta zerttelip jatyr. Osy tekserýlerdiń qorytyndysy boıynsha eń qatań sharalar qabyldanady», - dedi Áset Shyndalıev.
