Prezıdent teleradıokesheni qyzmetkerleri marapattaldy
ASTANA. KAZINFORM – 28 maýsym – BAQ ókilderiniń kásibı merekesi qarsańynda Kazinform agenttiginiń Shyǵys Qazaqstan oblysyndaǵy menshikti tilshisi Talǵatjan Muhamadıev memlekettik nagradamen marapattaldy.
- 2025 jylǵy 23 maýsymdaǵy Jarlyq boıynsha «Shapaǵat» medalimen nagradtaldy, - dep jazylǵan medal qujatynda.
Jarlyqqa Prezıdenttiń qoly qoıylǵan.
- Eńbegimniń elenip, osyndaı marapatqa ıe bolyp jatqanyma óte qýanyshtymyn. Bul - tek meniń ǵana emes, halyqaralyq Kazinform agenttiginiń marapaty. Bizdiń ujymda «Birlik» atty uly kúsh bar. Sol birligimizden aıyrylmaı, bıikterdi baǵyndyra bereıik, - degen áserimen bólisti Prezıdent qolynan marapat alǵan áriptesimiz Talǵatjan Muhamadıev.
Talǵatjan Muhametbekuly Óskemendegi S.Amanjolov atyndaǵy ShQÝ-dy «Jýrnalıstıka» mamandyǵy boıynsha támamdaǵan.
Eńbek jolyn 2015 jyly ShQO «Aldaspan» gazetinde tilshi bolyp bastady. ShQO «Meniń ólkem» gazetinde tilshi, respýblıkalyq «Jas qazaq», «Zań» gazetterinde Shyǵys Qazaqstan oblysy boıynsha menshikti tilshi, ShQO «Meniń ólkem» gazetiniń bas redaktory qyzmetterin atqarǵan. Kazinform agenttiginde 2021 jyldan beri jumys istep keledi.
Sonymen qatar Jibek Joly / Silk Way» telearnasynyń tilshisi Kúnsaıa Qurmet-Rahımovaǵa QR Prezıdentiniń BAQ salasyndaǵy syılyǵy tabystaldy.
Jibek Joly / Silk Way» telearnasynyń júrgizýshisi Erbolat Muhamedjan «Qurmet» ordenimen marapattaldy.
– Búgin Memleket basshysy Qasym-Jomart Toqaevtyń qolynan «Qurmet» ordenin aldym. Bul memlekettik nagradany jeke jetistik retinde emes, sońǵy on jyldan astam tabandy eńbektiń, bastamalar men jobalardyń baǵalanýy dep qabyldaımyn, - dep jazdy telejúrgizýshi áleýmettik jelidegi paraqshasynda.
Aıta keteıik, QR Prezıdentiniń teleradıokesheni — tolyq tsıkldy qazaqstandyq medıa-kompanııa, quramyna: Jibek Joly respýblıkalyq telearnasy, Silk Way jáne Silk Way Cinema halyqaralyq telearnalary, Kazinform HAA jáne Derekti fılmder ortalyǵy kiredi.
Aıta keteıik, Prezıdent BAQ salasy qyzmetkerlerin marapattady.