KazInform saıtyna eń kóp silteme jasaldy - D. Abaev
ASTANA. QazAqparat - QR Aqparat jáne kommýnıkatsııalar mınıstri Dáýren Abaev qoǵamdyq keńes músheleri aldynda esep berdi. Onyń aıtýynsha, bir jyl ishinde atqarylǵan jumystar az emes. Alda turǵan josparlar da jeterlik, dep habarlaıdy QazAqparat tilshisi.
"Biz memlekettik organdar men ulttyq kompanııalardyń aqparattyq jumysyna qatysty naqty talaptardy engizdik. Barshaǵa ortaq medıajospar qabyldandy. Onda árbir memlekettik organnyń sharalary kórsetilgen. Budan bólek, aqparat salasyndaǵy memlekettik tapsyrystyń biryńǵaı erejeleri bekitildi. Negizgi maqsat - ol tapsyrystyń ashyqtyǵyn qamtamasyz etý", - deıdi mınıstr.
Budan bólek, otandyq kınoǵa arnalǵan "El arna" iske qosyldy. Kazakh TV men "Bilim jáne mádenıet" arnalary biriktirildi. Sonyń arqasynda biraz aqsha únemdeldi. Esesine kontenttiń sapasy joǵarlady. "Qazsport", "Qazaqstan" men "Habar" arnalary HD formatqa aýysty. "24KZ" arnasyna rebrendıng jasaldy. "Jalpy aıtqanda, "Qazaqstan", "Habar" men "Habar24" arnalary bir-birine básekeles bolmaı, óz kórermenderin tabatyndaı jaǵdaı jasadyq. Osy ýaqytqa deıin alǵash ret "Tumar" ulttyq televızııalyq syılyǵy tabystaldy. Endi Aqparat pen baılanys qyzmetkerleri kúnine oraı, baspa, radıo men ınternet jýrnalıstıka salasyndaǵy "Úrker" syılyǵy tapsyrylady", - dep atap kórsetti Dáren Áskerbekuly.
Mınıstrdiń sózine qaraǵanda, otandyq serıaldardyń sapasy da jaqsaryp keledi. Qazirgi kezde Qazaqstanda túsirilgen serıaldardy Reseı, Qytaı men Qyrǵyzstannyń arnalary óz jerinde kórsetip jatyr. "Sondaı-aq biz "Kazaxstanskaıa pravda" men "Egemen Qazaqstan" gazetteriniń dızaıynyn ózgerttik. Atalǵan basylymdardyń saıttary jańartyldy. "Ádebıet portaly" pen National Digital History" saıtyna rebrendıng jasaldy. KazInform saıty óz jumysyn ózgertti. Ótken jyly atalǵan saıtqa eń kóp silteme jasaldy. Sondaı-aq "Tsıfrlyq Qazaqstan - 2020" baǵdarlamasynyń osy jylǵa arnalǵan barlyq maqsat-mindetteri aldyn ala oryndaldy. Halyqtyń kompıýterlik saýattylyǵy 76 paıyzdan asty. Barlyq úılerdiń 84 paıyzdan astamy ınternetti paıdalanady. Búginde aqparattyq texnologııalardy paıdalaný jaǵynan qala men aýyldyń arasynda úlken alshaqtyq bar. Qalada ınternet jyldam isteıdi. Sonyń arqasynda elektrondy portal arqyly memlekettik qyzmetterdi ońaı alýǵa bolady. Aýylda olaı emes. Sondyqtan biz qala men aýyldyń osy bir alshaqtyǵyn azaıtý maqsatynda arnaıy jobany usynyp otyrmyz. Atalǵan bastama júzege assa, úsh jyldyń ishinde 1 900 eldi mekende jyldam ári sapaly ınternet bolady. Osylaısha, 4 mıllıon adam keń jolaqty ınternetti qoldana bastaıdy", - dedi D. Abaev.
Aıta ketken jón, BUU men Dúnıejúzilik ekonomıkalyq forýmnyń sońǵy málimetterine sáıkes, Qazaqstan elektrondy úkimetti damytý jaǵynan 33-shi orynǵa kóterildi. Al jelilik ınfraqurylym boıynsha biz 39-shi orynda turmyz. Bul - TMD elderi ishinde eń úzdik kórsetkish.
Qoǵamdyq keńestiń búgingi otyrysynda mınıstrliktiń jumysy joǵary baǵalandy. Budan bólek, keńestiń quramyna jańa músheler qabyldandy.
