KAZINFORM redaktory halyqaralyq ádebı baıqaýda birinshi oryn aldy
ASTANA. KAZINFORM – «QazAqparat» halyqaralyq aqparat agenttiginiń shyǵarýshy redaktory Baqytjol Kákeshuly VIII Halyqaralyq Mahmud Qashqarı atyndaǵy áńgimeler baıqaýynda Qazaqstan atynan qatysyp, «Estilmeıtin kúı» atty shyǵarmasymen aımaqtyq birinshi orynǵa ıe boldy.
Túrkııanyń ádebıetke arnalǵan Edebiyat360 saıty men Eýrazııa Jazýshylar odaǵy jarııalaǵan málimetke sáıkes, baıqaý qorytyndysy 2026 jylǵy 24 qazanda jarııalanǵan. Bıylǵy baıqaýǵa túrki tilderi men olardyń dıalektilerinde jazylǵan barlyǵy 440 áńgime usynylǵan. Shyǵarmalar 12 el men aımaq boıynsha qurylǵan aldyn ala qazylar alqasynyń qaraýyna túsip, aldymen baıqaý talaptaryna sáıkestigi tekserilgen.
Uıymdastyrýshylardyń málimetinshe, baıqaýǵa Ázerbaıjannan 11, Gagaýzııadan 1, Soltústik Makedonııadan 2, Qazaqstannan 88, Qyrǵyzstannan 40, Ózbekstannan 10, Qarashaıdan 2, Balqardan 6, Saha elinen (ıAkýtııa) 1, Tatarstannan 16, Túrkııadan 48, Túrikmenstannan 16 jáne Germanııadaǵy uıǵyr qaýymynan 1 shyǵarma túsken. Qatysýshylardyń eń kóbi Qazaqstannan usynylǵan.
Baıqaýdyń aımaqtyq irikteý kezeńinde ár el men aımaqtan úzdik dep tanylǵan shyǵarmalar anyqtaldy. Qazylar alqasy músheleriniń qatysýymen jáne Eýrazııa Jazýshylar odaǵynyń tóraǵasy Ýfýk Týzmannyń jetekshiligimen ótken otyrysta júldeli oryndarǵa usynylǵan búrkenshik attar jazylǵan konvertter ashylyp, avtorlardyń shyn esimderi men ómirbaıandyq derekteri jarııa etildi.
Osylaısha, Qazaqstan atynan qatysqan Baqytjol Kákeshuly «Jalǵyz saıahatshy» búrkenshik atymen usynylǵan «Estilmeıtin kúı» áńgimesi arqyly aımaqtyq birinshi oryn ıegeri atandy.
12 el men aımaqtyń qalamgerleri aımaqtyq jeńimpaz atandy
Baıqaýdyń aımaqtyq birinshi oryn ıegerleri men olardyń shyǵarmalary tómendegideı:
1. Ázerbaıjan – Djoshgýn Halıloǵly «Sońǵy jumys kúni» («Sonuncu İş Günü») áńgimesimen jeńimpaz atandy. Búrkenshik aty – Zafar.
2. Soltústik Makedonııa – Gúlaı Alche «Iskender beı» («İskender Bey») áńgimesimen birinshi oryn aldy. Búrkenshik aty – Rýmelııa.
3. Qarashaı – Aıbazlany Soltan «Abaı aqqa» («Abay akka») áńgimesimen jeńimpaz atandy. Búrkenshik aty – Soltan.
4. Balqar – Mýsýkolanı Sakınat «Hýdojnık» («Hudojnik») áńgimesimen aımaqtyq birinshi orynǵa ıe boldy. Búrkenshik aty – Tamada egech.
5. Qazaqstan – Baqytjol Kákeshuly «Estilmeıtin kúı» áńgimesimen jeńimpaz atandy. Búrkenshik aty – Jalǵyz saıahatshy.
6. Qyrǵyzstan – Zınakan Pasanova «Kóshógósiz kolýktý» («Köşögösüz koluktu») áńgimesimen birinshi oryn aldy. Búrkenshik aty – Tym qyz.
7. Ózbekstan – Mahmadalıev Erkınjon «Kondon bıchılgan kafan» («Kondan Biçilgan Kafan») áńgimesimen aımaqtyq jeńimpaz atandy. Búrkenshik aty – Erkın Norsafar.
8. Saha eli (ıAkýtııa) – Agrafena Kýzmına «Bir qadam, bir tynys» («Bir adım, bir nefes») áńgimesimen birinshi orynǵa ıe boldy. Búrkenshik aty – Aıaana.
9. Tatarstan – Lılııa Gıbadýllına «Álııa» («Aliya») áńgimesimen aımaqtyq birinshi oryn aldy. Búrkenshik aty – Yazım Yazuvçu.
10. Túrkııa – Rejep Sýbashy «Kir etik, taza shulyq» («Pis Çizmeler, Temiz Çoraplar») áńgimesimen jeńimpaz atandy. Búrkenshik aty – Tańqalarlyq.
11. Túrikmenstan – Rejebov Akmyrat «At-Murad» («At-Murad») áńgimesimen birinshi oryn aldy. Búrkenshik aty – Sahraıy.
12. Uıǵyr (Germanııa) – Habıbýlla Áblımıt «Kúrshad» («Kürşad») áńgimesimen aımaqtyq jeńimpaz atandy. Búrkenshik aty – Aıbıbýlla.
Mahmud Qashqarı atyndaǵy halyqaralyq áńgimeler baıqaýy túrki halyqtarynyń ádebı baılanysyn nyǵaıtyp, ortaq mádenı murany kórkem shyǵarma arqyly tanytýǵa baǵyttalǵan. Onyń ereksheligi – Túrkııa túrikshesimen qatar qazaq, qyrǵyz, ózbek, ázerbaıjan, tatar, túrikmen jáne ózge de túrki tilderinde jazylǵan týyndylardyń bir alańda baǵalanýy.
Baıqaýdyń aımaqtyq kezeńinde jeńimpaz atanǵan qalamgerlerdiń shyǵarmalary halyqaralyq kezeńde qaralyp, úzdik týyndylar anyqtalady. Halyqaralyq bas júldelerdiń túpkilikti qorytyndysy men marapattaý rásimi 2026 jylǵy 8 jeltoqsanǵa josparlanǵan.
Qazaqstandyq qalamgerdiń bul jetistigi otandyq ádebıettiń túrki álemindegi shyǵarmashylyq baılanystar aıasynda tanylýyna múmkindik beredi.
Osyǵan deıin qazaq ádebıetin álemniń 125 elinde oqıtyny týraly jazdyq.