Kazinform kótergen másele: Pavlodar kınoteatryna Sháken Aımanov ataýy qaıta oraldy
PAVLODAR. KAZINFORM - Pavlodarda eski kınoteatrlardyń birindegi Sháken Aımanovtyń esimi tuǵyryna qaıta qondy. Halyq jaqsy kóretin ataýdyń qaıta jarqyraǵanyna jergilikti jurt rıza.
Bul týraly óńirlik Mádenıet, tilderdi damytý jáne arhıv isi basqarmasynyń basshysy Medet Taýasqan habarlady.
- Pavlodar óńiriniń jurtshylyǵy men oblystyq Mádenıet, tilderdi damytý jáne arhıv isi basqarmasynyń usynysymen kórnekti akter, rejısser, ulttyq kınematografııanyń negizin qalaýshylardyń biri - Sháken Aımanovtyń esimi kınoteatrǵa qaıta oraldy. Ǵımarattyń menshik ıesine usynysymyzdy qabyl alǵany úshin zor alǵysymyzdy bildiremiz! – dep málimdedi basqarma basshysy.
Bıylǵy tamyz aıynda Pavlodarda Sháken Aımanovtyń esimin ıelenip kelgen kınoteatrdyń ataýy bir-aq kúnde ózgerip shyǵa kelgenin jazǵanbyz.
Jańa kompanııa Aımanov ataýyn alyp tastap, óz brendterin ornatyp qoıǵan. Uzaq jyldar boıy kınorejısserdiń esimin ıelenip kelgen ǵımarat ataýynyń ózgerýi jergilikti qoǵamǵa unamady. Rýhanı qundylyqtan buryn kommertsııalyq múddeni alǵa qoıǵan bul sheshim ulttyq ónerge jasalǵan qurmetsizdik retinde qabyldandy. Óńir jurtshylyǵy mádenı nysanǵa Sháken Aımanovtyń esimin qaıtarýdy talap etken edi.
Keıin ǵımarat ıesi Sháken Aımanov jazýy konstrýktsııasy ábden eskirgeni sebepti alynyp tastalǵanyn aıtyp aqtalǵan. Jańartylǵan nusqadaǵy jańa ataý kúzde qoıylady dep ýáde etken bolatyn.
