Kazinform Informsport.kz portalyn iske qosady
ASTANA. KAZINFORM — Jańa Informsport.kz portaly Qazaqstandaǵy, óńirdegi jáne álemdegi sport jańalyqtaryn jedel jarııalaıtyn aqparattyq resýrs bolady.
Jańa portal sport salasyndaǵy memlekettik saıasatty aqparattyq turǵydan qoldaýǵa, sondaı-aq eldiń sport salasyndaǵy ózekti máseleler boıynsha qoǵamdyq pikir almasýdy damytýǵa baǵyttalǵan.
Prezıdent Qasym-Jomart Toqaev belgilegen taqyryptarǵa erekshe nazar aýdarylady: buqaralyq jáne jasóspirimder sportyn damytý, sport federatsııalarynyń tıimdiligin arttyrý jáne Olımpıadalyq rezerv mektepteri men kolledjderin qoldaý.
Portaldyń negizgi ustanymy — balalar-jasóspirimder sportynan bastap joǵary jetistikter sportyna deıingi sport salasynyń barlyq segmentin kásibı jáne obektıvti túrde aqparattandyrý.
Jańa portal jańalyqtar men taldamalyq materıaldardy, sondaı-aq sarapshylar pikirin bir alańǵa toǵystyrýdy kózdeıdi. Saıtta jańalyqtar, suhbattar, sholýlar, mamandardyń pikirleri, óńirlerdegi sporttyq bastamalar, úzdik jobalar jáne jas sportshylardy daıarlaý týraly materıaldar jarııalanyp turady.
Informsport-ty qurý Kazinform-nyń zamanaýı tsıfrlyq medıany damytý jáne onyń taqyryptyq baǵyttaryn keńeıtý strategııasynyń bóligi. Jańa portal sport qaýymdastyǵy, kásibı sportshylar, jattyqtyrýshylar, sarapshylar jáne barlyq sport áýesqoılary úshin senimdi aqparat kózine aınalýdy maqsat etedi.
Jobanyń iske qosylýy álemdegi eń aýqymdy sporttyq oqıǵalardyń biri — álemniń mıllıondaǵan jankúıerlerin biriktire otyryp úsh elde — AQSh, Kanada jáne Meksıkada alǵash ret ótetin FIFA álem chempıonatymen tuspa-tus keldi. Informsport oqyrmandardy týrnır barysy, ulttyq quramalardyń óner kórsetýi, mańyzdy matchtar jáne álemdik fýtbol merekesiniń eń jarqyn sátteri týraly jedel ári senimdi aqparatpen qamtamasyz etedi.
Informsport — jeńis tarıhtary bastaý alatyn sport alańy.
