Kazinform halyqaralyq aqparat agenttigine 105 jyl
ASTANA. KAZINFORM — Mereıtoı qarsańynda arnaıy ázirlengen «Kazinform. Bizdiń tarıhymyz» atty derekti fılm tanystyrylyp, «Kazinform: shynaıy hronıka» kitabynyń tusaýy kesildi. Ári, agenttiktiń damýyna eleýli úles qosqan azamattar marapattaldy.
Bir ǵasyrdan astam tarıhy bar QazAqparat búginde senimdi aqparat derekkózine aınaldy. Agenttik qoǵamdyq pikirdi qalyptastyryp, el men álem jańalyqtaryn shynaıy jetkizedi.
Agenttik ardageri Jarylqap Beısenbaıulynyń sózinshe, bul datany — qazaq aqparat keńistiginiń 105 jyldyǵy dep te ataýǵa bolady.
— Sonaý 20-shy jyldardan bastap, osy qazaq aqparat keńistiginde alar orny erekshe. Elimizdiń aqparat keńistigindegi iri-iri tulǵalardy tárbıeledi. Sebebi osy ýaqyt aralyǵynda talaı dúldúldiń talabyn ashty, qanatyn qataıtty, — deıdi ol.
Osy tizimde Qasym Sháripov, Júsip Altaıbaev, Keńes Úsebaev, Kákimjan Qazybaev syndy sala sańlaqtaryn erekshe ataýǵa bolady. Ári, bul azamattar týraly estelikter búgin tusaýy kesilgen «Kazinform: shynaıy hronıka» kitabynda da jazylǵan. Joba jetekshisi Vladımır Kýrıatov bul kitap — keıingi jas býynǵa kómek quraly retinde shyǵarylǵanyn atap ótti.
— Biz birinshi kezekte uzaq jyldar boıy jınaqtaǵan tájirıbemizben bóliskimiz keldi. Sondyqtan, ótken tarıhpen birge, qazirgi jahandaný zamanynda agenttik nemen aınalysyp jatqany týraly jazdyq. Sondaı-aq, vırýstyq kontent, tereń taldaý men ádil jýrnalıstik zertteý daıyndaý úshin qandaı tásilder qajet ekendigin de qostyq, — dedi Kazinform HAA dırektorynyń orynbasary.
«Kazinform: shynaıy hronıka». Bul kitapqa 105 jyldyq tarıh pen eskirmeıtin estelikter engizilgen. Týyndynyń ár paraǵynda tym tereń, myń maǵyna bar. Agenttiktiń keshesi men búgini tolyq qamtylǵan. Sondaı-aq, jańalyqtar ázirleý ustahanasynyń kásibı qupııalaryn da kórýge bolady.
Sondaı-aq, shara barysynda «Kazinform. Bizdiń tarıhymyz» atty derekti fılm kelýshiler nazaryna usynyldy. Fılmdi bastan aıaq ázirleýge úsh aı ýaqyt ketken. Týyndyda «QazROST»-tan bastap «QazAqparatqa» deıingi tarıh sýretteldi.
— Búgingi data — úlken ataýly data. Bul úlken jetistik, úlken jaýapkershilik. Óıtkeni ári qaraı Kazinform damıdy, ári qaraı qalaı jumysty jalǵastyrady. Qalaı ol aqparatty óńdep, elimizde bolyp jatqan jaǵdaıdyń bárin álemde, Ortalyq Azııada bolyp jatqan búkil aqparatty ýaqytysynda shyǵaryp, ony óziniń arhıvinde saqtaý óte úlken jaýapkershilik, — deıdi QR PІB «QR Prezıdentiniń TRK» ShJQ RMK dırektorynyń orynbasary Asqar Jaldınov.
Budan bólek, halyqaralyq aqparat agenttiginiń damýyna úles qosqan azamattarǵa Prezıdent atynan alǵys hattar tabystaldy.
Aıta keteıik, búginde QazAqparat quramynda 100-den astam tilshi bar. 6 redaktsııa táýlik boıy ózekti taqyryptardy qaýzap, aqparat taratady. Álemniń 11 núktesinde menshikti tilshileri de bar. Ári 40-tan astam elmen áriptestik kelisim jasaǵan.