KAZINFORM FOTOShEJІRESІ: elordada Jeńistiń 80 jyldyǵyna arnalǵan kórme ashyldy
ASTANA. KAZINFORM – «Kazinform» halyqaralyq aqparat agenttigi men «Qazaqstan temir joly» ulttyq kompanııasy» AQ elordanyń «Nurly jol» vokzalynda Jeńistiń 80 jyldyǵyna arnalǵan fotokórme usyndy.
- Aldymen 7 mamyr Otan qorǵaýshylar kúni jáne 9 mamyr Jeńis kúnimen quttyqtaımyn! Búgingi is-sharany uıymdastyrýǵa atsalysqan «Qazaqstan temir joly» ulttyq kompanııasynyń basshylaryna kóp rahmet. Bizdiń aıtarymyz, sýretter sóılesin, Kazinform agenttiginiń 105 jyl tarıhy bar, osy ýaqyt ishinde mıllıondap jınalǵan foto qor bar, sonyń ishinde soǵysqa taqyrybyna arnalǵan myńdaǵan foto jınaqtalǵan. Sol tarıhı fotolardyń ishinen 80 fotony iriktep aldyq, muraǵat fotolardyń kóbi áli jarııalanǵan joq. Vokzal jolaýshylary, qala qonaqtary tamashalasyn degen oımen uıymdastyryp otyrmyz - dedi Prezıdent Teleradıokesheni dırektorynyń óndiris máseleleri jónindegi orynbasary Asqar Jaldınov kórmeniń ashylý saltanatynda.
Aıta ketsek, soǵys jyldary maıdanǵa 1,2 mıllıonnan astam qazaqstandyq attandy. Olardyń jartysyna jýyǵy – 600 myńnan astam adam týǵan jerine oralmady. Jeńiske jol tek maıdan shebinde ǵana emes, tylda da salyndy. Maıdanda atylǵan on oqtyń toǵyzy Qazaqstan zaýyttarynda quıyldy jáne elden 1500 vagon kıim-keshek pen azyq-túlik jóneltildi. Jeńil ónerkásip kásiporyndary 2 mıllıon sarbaz ben ofıtserdi kıimmen qamtamasyz etti. 78 gospıtalda jaralanǵan jaýyngerlerge kómek kórsetildi. Qazaqstandyqtar qorǵanys qoryna 4 mıllıon rýblden astam qarajat jınady. 1945 jyly stýdentterdiń qarajatyna qurylǵan tank kolonnasy Berlın shabýylyna qatysty.
Kórmege Kazinform fototilshileriniń soǵys jyldary túsirgen 80 biregeı sýreti shyǵarylǵan. Olar tórt taqyrypqa toptastyryldy: «Ekinshi dúnıejúzilik soǵys – 1939–1945 jyldar», «Panfılovshy batyrlar», «Tyldaǵy áıelder eńbegi» jáne «Temirjol. Soǵys jyldary, soǵysqa deıingi jáne soǵystan keıingi kezeń». Ókinishke qaraı, sol kezeńdegi kóptegen fotosýretterdiń avtorlary belgisiz bolyp qalǵan. Anyqtalǵan avtorlardyń qatarynda V. Grebnev, ıÝ. Redkın, G. Galkın bar. Avtorlardyń esimin qalpyna keltirý jumysy jalǵasyp jatyr.
- Jeńistiń 80 jyldyǵyna oraı, elimizde kórshi memleketterde kóptegen is-shara uıymdastyrylyp jatyr, biraq, búgingi tarıhı sýretter kórmesi róli erekshe. Óıtkeni, 80 jyldyq Jeńis tarıhyn eske alǵanda, óskeleń urpaqtyń sýretterge qarap jady jańǵyratyny sózsiz. Surapyl soǵys tek qana qan maıdan alańynda júrgen joq, tylda da júrdi. Bizdiń ata-babamyz tek qarý ustap kúresken joq, sonymen qatar fototilshiler de sol qan maıdannyń ortasynda júrip búgingi urpaqqa sol soǵysty kóz aldymyzǵa elestetýimizge sebep boldy. Kezindegi QazTAG búgingi Kazinform-nyń 105 jyldyq tarıhynda saqtalǵan fotolar búgin qaıta jańǵyryp jatyr. Dál osy kórme arqyly búgingi urpaqtyń ata-babaǵa taǵzymy baıqalady, - dedi Senat depýtaty Bıbigúl Jeksenbaı.
Fotosýretterdegi keıipkerler — soldattar, jumysshylar, dárigerler, ǵalymdar — Jeńis rýhynyń, Otanǵa degen súıispenshilik, paryzǵa adaldyq, patrıotızm men janqııarlyqtyń beınesi.
- Kórmege Kazinform halyqaralyq aqparat agenttiginiń jeke muraǵatyndaǵy buryn-sońdy jarııalanbaǵan fotolary qoıyldy. Naqty aıtqanda, Ekinshi dúnıejúzilik soǵys kezinde batyrlyǵymen tanylǵan, babalarymyz bar, odan bólek, tylda eńbek etken otandastarymyzdyń tarıhı sáti beınelengen sýretter tańdaldy. Sonymen qatar Qazaqstanda temir jol salasynyń damý tarıhynan syr shertetin arhıvtik sýretter kópshiliktiń nazaryna usynylyp otyr. Agenttiktiń muraǵatynda elimizdiń kez kelgen salasy boıynsha arhıvtik fotolar qory jınalǵan, sonyń ishinen Jeńistiń 80 jyldyǵyna oraı, 80 fotony tańdap aldyq. Aıta ketsek, arhıvtik fotolardy vıdeo formatta elimizdiń barlyq áýejaıy men vokzalyndaǵy LED ekrandardan tamashalaý múmkindigi bar,- deıdi Kazinform halyqaralyq aqparat agenttigi basqarýshy dırektorynyń orynbasary – qazaq redaktsııasynyń bas redaktory Naǵashybek Aldan.
Olardyń qatarynda – Keńes Odaǵynyń eki márte Batyry, aty ańyzǵa aınalǵan ushqysh Talǵat Bıgeldınov, ataqty mergen Álııa Moldaǵulova, erjúrek pýlemetshi Mánshúk Mámetova, qaısar general-maıor Ivan Panfılov, Keńes Odaǵynyń Batyry Baýyrjan Momyshuly jáne basqa da kóptegen tulǵa bar. Olardyń erlikteri – halqymyzdyń tegeýrindi erik-jigeri men qaıtpas rýhynyń sımvoly.
«Qazaqstan temir joly» ulttyq kompanııasy soǵys jáne eńbek ardagerlerin ulyqtaýǵa erekshe mán beredi. Jeńistiń 80 jyldyǵy — barshamyz úshin mańyzdy data. Temirjolshylar Jeńiske orasan zor úles qosty. Bul — biz úshin aıryqsha mereke. Biz Kazinform agenttiginiń jobasyna erekshe yqylaspen qatystyq. Biz jolaýshylarmen qatar, óskeleń urpaq tarıhty tereńirek tanýy úshin osyndaı jobalarǵa árdaıym qoldaý bildiremiz. Jalpy vokzal aýmaǵynda taqyryptyq kórmelerdi jıi ótkizip turamyz, adamdar kórip, esten shyǵarmasyn deımiz, - dep atap ótti «Qazaqstan temir joly» ulttyq kompanııasy AQ basqarma tóraǵasynyń orynbasary Talǵat Aldabergenov.
Kórmeniń ashylýyna Senat jáne Májilis depýtattary, ardagerler uıymynyń ókilderi men «Qazaqstan temir joly» ulttyq kompanııasynyń qurmetti ardager qyzmetkerleri qatysty.
Sondaı-aq is-shara qonaqtary kórmeniń resmı ashylý saltanatynan keıin vokzal aldyna aǵashtar otyrǵyzdy. Elordanyń «Nurly jol» vokzalyndaǵy fotokórme bıyl 31 shildege deıin jumys isteıdi.
Eske salaıyq, Kazinform agenttiginiń Jeńis kúnine arnalǵan arnaıy jobasy bar. Ol Qazaqstan halqynyń Ekinshi dúnıejúzilik soǵys jyldarynda kórsetken erligi týraly tsıfrly estelik. Maqsat - beıbit bolashaq úshin batyldyq tanytqan batyrlardy este saqtaý.
