Kazinform fotografy ulttyq sportty álemge pash etkeni úshin marapattaldy
ASTANA. KAZINFORM – Respýblıkalyq Kókpar federatsııasynyń uıymdastyrýymen ótken «KÓKPAR AWARDS – 2025» qorytyndy is-sharasynda ulttyq sportty damytýǵa súbeli úles qosyp júrgen sala úzdikteri marapattaldy.
Respýblıkalyq Kókpar federatsııasynyń uıymdastyrýymen ótken qorytyndy is-sharada ulttyq sporttyń damýyna bir jyl boıy eńbek etken úzdikter anyqtaldy.
Saltanatty jıynda kókpar sportynyń órkendeýine úles qosqan sportshylar, bapkerler, atbegiler, balýandarmen qatar, ulttyq qundylyqtardy aqparattyq keńistikte nasıhattap júrgen medıa ókilderi de marapattaldy.
Atalǵan is-shara barysynda Kazinform halyqaralyq aqparat agenttiginiń fotografy Maqsat Shaǵyrbaı «Úzdik fotograf» nomınatsııasyna ıe boldy. Bul marapat fototilshiniń bir jyldyq eńbeginiń ǵana emes, ulttyq sportty uzaq jyldar boıy kásibı deńgeıde júıeli túrde nasıhattap kele jatqan shyǵarmashylyq jolynyń nátıjesi retinde baǵalandy.
Maqsat Shaǵyrbaı buǵan deıin de halyqaralyq deńgeıdegi bedeldi fotobaıqaýlarda joǵary jetistikterge jetken. Atap aıtqanda, 2025 jyly ótken dúnıejúzilik fotosaıysta onyń týyndysy 447 myńnan astam fotosýrettiń ishinen ekinshi orynǵa ıe bolyp, halyqaralyq sarapshylardyń joǵary baǵasyn aldy.
Bul jetistik Kókpar federatsııasynyń bıylǵy qorytyndy is-sharasynyń syılyǵyn taǵaıyndaý barysynda eskerilgen negizgi kórsetkishterdiń biri boldy.
Fototilshiniń aıtýynsha, aldaǵy ýaqytta kókpardy jáne jalpy ulttyq sport túrlerin keńinen dáripteýge baǵyttalǵan birqatar aýqymdy joba júzege asyrylmaq.
– Alda naqty josparlar bar. Bıyl úsh iri kýbok uıymdastyrylady, sonyń biri Túrkistan qalasynda ótedi. Sonymen qatar 2026 jylǵy qyrkúıek aıynda Qyrǵyzstanda ótetin Kóshpendiler oıyndaryna daıyndyq bastalady. Osy mańyzdy jarystardyń barlyǵyn jan-jaqty nasıhattap, fotoóner arqyly ulttyq sporttyń rýhyn kórsetý – basty maqsatym, – dedi Maqsat Shaǵyrbaı.
Budan buryn Kazinform aqparat agenttiginiń fotografy halyqaralyq PhotOlympic-2025 fotobaıqaýynda top jarǵanyn jazǵan edik.