Kazinform agenttigine — 105 jyl: quttyqtaýlar men jyly lebizder

ASTANA. KAZINFORM — Búgin elimizdegi eń kóne medıaresýrstardyń biri — Kazinform halyqaralyq aqparat agenttigine 105 jyl tolyp otyr. Aıtýly dataǵa oraı agenttik ujymynyń atyna memlekettik organdardan quttyqtaý hat-habar kelip jatyr.

Kazinform ujymyn alǵashqylardyń biri bolyp Qazaqstan Prezıdentiniń keńesshisi — baspasóz hatshysy Rýslan Jeldibaı quttyqtady.

— Kazinform halyqaralyq aqparat agenttiginiń 105 jyldyǵy qutty bolsyn! Prezıdentimiz Qasym-Jomart Toqaevtyń ádiletti Qazaqstan qurý bastamasyn jan-jaqty nasıhattap, elimizdiń damýy men órkendeýi jolynda memleketshil sana qalyptastyrýǵa atsalysyp kele jatqan eńbekterińiz jemisti bolýyna árdaıym tilektespin, — dep yqylas tanytty.

Odan ári QR Parlamentiniń Senaty mereıtoıǵa oraı jyly lebiz jetkizdi.

— Senimdi ári jedel aqparat kózi retinde ǵasyrdan astam ýaqyt boıy bedelin saqtap kele jatqan agenttik Senattyń jumysyn jáne elimizdiń mańyzdy oqıǵalaryn jarııalaýda erekshe úles qosyp keledi. Shyǵarmashylyq tabys, jańa ıdeıalar jáne tyń belester tileımiz! , — delingen habarlamada.

Sondaı-aq Májilis tóraǵasy Erlan Qoshanovtyń atynan quttyqtaý kelip tústi.

— Agenttik bir ǵasyrdan beri tynymsyz aqparat taratyp, qalyń oqyrmannyń yqylasyna bólenip keledi. El ómirindegi eleýli oqıǵalardy jurtshylyqqa jarııalap, memleketimizdiń ǵasyrlyq shejiresin tasqa qashady. Osy ýaqyt ishinde Kazinform aqparat aıdynynda biregeı orny, ózindik qoltańbasy bar irgeli ujymǵa aınaldy. Munda elge belgili qarymdy qaıratkerler men ult zııalylary qyzmet etti. Ásirese, Memleket basshysy Qasym-Jomart Toqaevtyń aýqymdy reformalaryn jan-jaqty nasıhattaýǵa, olardy iske asyrýǵa zor úles qosyp jatyrsyzdar, — deıdi spıker. 

Artynsha elimizdiń Syrtqy ister mınıstrligi qazaq aqparatynyń qara shańyraǵyna arnaıy kelip yqylasyn jetkizip, ujymdy mereıtoımen quttyqtady. 

— Halyqaralyq mártebege ıe bolǵan bedeldi uıym elimizdiń medıa keńistiginde aıryqsha orynǵa ıe bolyp, Qazaqstannyń saıası, ekonomıkalyq, áleýmettik jáne mádenı ómiri týraly shynaıy da senimdi aqparatty shekara asyra jetkizetin mańyrdy arnaǵa aınaldy. Jahandyq aqparattyq aǵyn údeı túsken zamanda medıaresýrs — senimdi ári tekserilgen málimetterdiń qaınar kózi retinde Qazaqstandy shetelde obektıvti tanystyrý isinde Syrtqy ister mınıstrliginiń mańyzdy seriktesi, — delingen quttyqtaý hatynda.

Odan bólek Qazaqstan Respýblıkasynyń Ortalyq saılaý komıssııasy basshylyǵy agenttik ujymyna shabyt pen jańa belesterge jetýdi tiledi.

— Ortalyq saılaý komıssııasy atynan saılaý jáne referendým naýqany kezinde únemi aqparattyq qoldaý kórsetip, saılaý protsesiniń ashyqtyǵy men aıqyndylyǵyn qamtamasyz etýge qosqan úlesterińiz úshin shynaıy alǵysymyzdy bildiremiz jáne joǵary baǵalaımyz, — delingen quttyqtaý mátininde.

Kazinform agenttiginiń 105 jyldyǵyna oraı Astana qalasy ákimdiginiń Іshki saıasat basqarmasy jáne basqa memlekettik organdarynyń basshylyǵy ujymdy quttyqtady.

Shyǵarmashylyq ujymnyń mereıtoıymen ortaqtasqan uıymdar qatarynda «Báıterek» ulttyq basqarýshy holdıngi de bar.

Búgin Qazaqstan jylnamasynyń jarshysy Kazinform agenttigine — 105 jyl. 

Mereıtoıǵa oraı agenttikte birqatar materıal jarııalandy. Oqyrmandarǵa Kazinform taspalaǵan tarıhı sýretterdi usynǵan edik. 

Osynaý ataýly data qarsańynda «QazAqparat» Halyqaralyq aqparat agenttiginiń ardageri, Qazaq redaktsııasynyń 1997-2011 jyldar aralyǵyndaǵy bas redaktory, belgili jazýshy, jýrnalıst, Qazaqstannyń eńbek sińirgen qaıratkeri Jarylqap Beısenbaıulyn sózge tartqan bolatynbyz.