Kazinform agenttigi Qytaı qazaqtaryn aqparatpen qamtyp otyr
QULJA. KAZINFORM — Qytaıdyń Іle Qazaq avtonomııaly oblysynyń Qazaqstanmen tarıhı ári mádenı, ekonomıkalyq baılanysy tereń. Qazir osynda 47 ult ókili tatý-tátti ómir súrip jatqanyn baıqadyq. Osy oraıda bul óńirdegi Syrtqy ister keńsesiniń qyzmetkeri Gúlnur Kenjebekqyzy Kazinform agenttigine jergilikti jastardyń múmkindigi, qazaq tilin qoldaý is-sharalaryna qatysty baıandap berdi.
Quljadaǵy jastardyń jaǵdaıy
Mundaǵy jastardyń kóbi Beıjińde nemese Shanhaıda joǵary bilim alýǵa tyrysady. Sonymen qatar, Qazaqstannyń ýnıversıtetterine de oqýǵa túsip jatqandar barshylyq. Keıingi jyldary Qazaqstannan Shyńjańdaǵy oqý oryndaryna túsip jatqandar kóbeıgen.
- Týrıst retinde Almatyda eki ret boldym, endi Astanaǵa barý josparda bar. Quljadaǵy qazaqtar Qazaqstanǵa saýda jasaýǵa nemese bilim alýǵa baryp jatyr. Buǵan keıingi jyldary ashylyp jatqan áýe reısteri jaqsy áser etip otyr, - deıdi Gúlnur Kenjebekqyzy. - Ózim Quljaǵa jaqyn aýyldardyń birinde dúnıege keldim. Otbasymyzdyń negizgi ýaqyty jaılaýda ótetin. Osyndaǵy baǵdarlama aıasynda 2012 jyly Beıjińge oqýǵa túsip, 6 jyl bilim alyp, Shanhaıda úsh jyl jumys istedim. Al Quljada keıingi eki jyl qatarynan memlekettik qyzmette júrmin. Bizde aqysyz negizde bilim alýǵa múmkindik bar. Bárine teń múmkindik jasalǵan. Sondyqtan oqýdy aıaqtaǵannan keıin, týǵan jerime kelip, qyzmet etýdi jón sanadym. Quljada ata-anam men eki aǵam turyp jatyr. Týystardyń barlyǵy osy óńirde.
Gúlnur Kenjebekqyzy jaqynda osynda óziniń baspanasyn alǵan. Kúsh-jigerin bul óńirdi damytýǵa jumsap, jergilikti turǵyndardyń ómir súrý sapasyn jaqsartýdy óziniń basty maqsaty etip alǵan.
– Quljada jaqsy ómir súrý úshin barlyq jaǵdaı jasalǵan. Qalada qaýipsizdik júıesi qamtamasyz etilip, kólik júıesi jaqsy damyp keledi, - dedi ol.
Onyń sózine qaraǵanda, óńirdegi jastardyń ortasha aılyq tabysy 5 myń ıýan shamasynda. Eń az degende, 3-4 myń ıýan jalaqysy bar jumysqa ornalasýǵa bolady. Al zeınetaqy somasy 4 myń ıýannen joǵary.
- Bizde memlekettik qyzmette dárejeńe qaraıdy. Osy oraıda, ortasha eseppen orta býyndaǵy qyzmetkerlerde 5-7 myń ıýan aılyq bolsa, bastyqtarda 10 myńnan asýy múmkin, - dedi ol.
Qazaqstannan týrıster kóp kele me?
- Biz kóbine Qazaqstannan memlekettik qyzmetpen kelgen meımandardy qarsy alamyz. Olar saýda, mádenı yntymaqtastyq salasynda kelissóz júrgizedi. Budan bólek, týrıst retinde saparlap, osyndaǵy tarıhı nysandarmen tanysýǵa keletinder az emes.
Bizde 11 aýdan bar. Sondyqtan tabıǵaty tamasha jaılaýlarǵa barýǵa keńes berer edim. Narat jaılaýynda jyldyń kez kelgen mezgili erekshe. Nylqy aýdanyndaǵy jaılaýlar kórki kóz arbaıtyn ásem tabıǵatymen jurtqa tanymal. Bul alqapta ara sharýashylyǵy jaqsy damyǵan, - dedi Gúlnur Kenjebekqyzy.
Bul jaqta tulparlarymen ataǵy shyqqan Mońǵolkúredegi jylqy ósirý sharýashylyǵynyń tamyry tereńde. Іle tuqymyn ósiretin bul aýdanda myńdaǵan jylqy bar. Qytaı aýyl sharýashylyǵy mınıstrligi 2003 jyly Mońǵolkúre aýdanyna «Qytaıdyń tulpar mekeni» degen ataq bergen.
- Munymen qosa, Qazaqstannan saparlap kelgender Qorǵas beketine barady. Qazir sol jerde saýda qyzyp tur, - deıdi.
Turǵyndar Qazaqstan týraly aqparatty qaıdan alady?
Іle Qazaq avtonomııaly oblysynyń halqy Qazaqstanǵa qatysty aqparatty kóbine ınternetten, áleýmettik jeliden alady.
- Jalpy, tóte jazý álipbıi keńinen qoldanylady. Aǵa býyn osy álipbıdi jaqsy meńgergen. Kazinform agenttiginiń tóte jazý redaktsııasy jarııalaǵan aqparat pen tanymdyq maqalany osy óńirdegi qazaqtar kóp oqıdy. Qazaq otbasylary tek qazaqsha sóıleıdi. Balalarǵa da óz tilimizdi, dástúrimizdi úıretýge nazar aýdarylǵan. Jergilikti turǵyndar Naýryzdy erekshe atap ótedi, - deıdi G. Kenjebekqyzy.
Sonymen qatar jastar jaǵy málimetti áleýmettik jeliden oqyp alady eken.
Onyń sózine qaraǵanda, memlekettik qyzmette negizinen qytaı tilinde aqparat almasý júredi. Osy oraıda, óńirdegi ózge ult ókilderi tilderin umytpas úshin tıisti qoldaý jasalyp otyr.
- Osynda biraz ult ókili turyp jatyr. Bir-birimizge teń qaraımyz. Basshylyq laýazymdaǵy qazaqtar az emes, - deıdi Syrtqy ister keńsesiniń qyzmetkeri.
Aıta keteıik, bıyl Kazinform halyqaralyq aqparat agenttigine 105 jyl toldy.