Kazinform –105 jyl: áriptester men seriktesterdiń ystyq yqylasy
ASTANA. KAZINFORM — Búgin elimizdegi eń kóne medıaresýrstardyń biri — Kazinform halyqaralyq aqparat agenttigine 105 jyl tolyp otyr. Aıtýly dataǵa oraı agenttik ujymynyń atyna jan-jaqtan quttyqtaý hat-habar túsip jatyr.
Tańerteń seriktes Irannyń IRNA aqparat agenttiginiń atynan quttyqtaý kelip tústi.
— Kazinform aqparat agenttiginiń 105 jyldyq mereıtoıymen shyn júrekten quttyqtaımyn. Bir ǵasyrdan astam ýaqyt boıy Kazinform birneshe urpaqty aqparattandyryp, qoǵamdyq pikirdi qalyptastyryp kele jatqan senimdi jańalyq kózi bolyp keledi. Bul — asa zor jetistik. Biz IRNA agenttiginde Qazaqstan Prezıdentiniń Teleradıo keshenimen ornatqan ózara baılanysty joǵary baǵalaımyz jáne Iran men Qazaqstan halqynyń máńgilik dostyǵyna, sondaı-aq ortaq kásibı maqsatqa negizdelgen yntymaqtastyqtyń jalǵasatynyna úmittenemiz, — degen lebizdi qabyl aldyq.
Sondaı-aq Mońǵolııa eliniń Montsame ulttyq aqparat agenttigi mereıtoımen ortaqtasyp, materıal jarııalady.
Mereıtoımen tańerteń kórshi baýyr halyq Ózbekstannyń UzA ulttyq aqparattyq agenttigi iltıpatyn jetkizdi.
Bolgarııanyń NOVINATA.BG ulttyq aqparat agenttigi de yntymaqtastyqqa razylyǵyn bildirip, birlesken jumys elder arasyndaǵy ózara túsinistikti nyǵaıtýǵa jáne senimdi aqparatty taratýǵa yqpal etetinin atap ótti.
Agenttikke quttyqtaý joldaǵan ózge de halyqaralyq seriktester boldy, atap aıtqanda ÁZERTADJ (Ázerbaıjan), TPS (Izraıl), «Armenpress» (Armenııa). Áriptester Kazinform agenttiginiń kásibı jýrnalıstıkany damytýǵa, tájirıbe almasýǵa jáne shynaıy aqparatty taratýǵa qosqan úlesine erekshe toqtaldy.
Odan bólek reseılik TASS aqparat agenttigi ujymynan qýanyshty habar keldi.
— Kazinform qyzmet jyldarynda oqıǵalardyń shynaıy kórinisin beıneleıtin ózekti jáne tekserilgen jańalyqtardy usynyp, senimdi aqparat kózi retinde tanyldy. Kásibı ujym aınymas biliktiligi men isine adaldyǵy oqyrmandar men jazylýshylardyń zor senimi men qurmetine ıe boldy. Kazinform halyqaralyq jýrnalıstıkanyń damýyna eleýli úles qosyp, Qazaqstan Respýblıkasynyń jáne búkil álemniń mańyzdy saıası, ekonomıkalyq, áleýmettik, mádenı jáne sporttyq oqıǵalaryn jarııalap keledi, — delingen quttyqtaý hatta.
Mereıtoıdy jergilikti seriktester de nazardan tys qaldyrǵan joq — InBusiness agenttigi «Kazinform» agenttiginiń táýelsiz Qazaqstannyń qalyptasý tarıhyndaǵy rólin atap kórsetti.
Buǵan deıin aıtýly dataǵa oraı agenttik ujymynyń atyna memlekettik organdardan kelip túsken quttyqtaýlarmen bólisken edik.
Búgin Qazaqstan jylnamasynyń jarshysy Kazinform agenttigine — 105 jyl.
Mereıtoıǵa oraı agenttikte birqatar materıal shyqty. Oqyrmandarǵa Kazinform taspalaǵan tarıhı sýretterdi usynǵan edik.
Osynaý ataýly data qarsańynda «QazAqparat» Halyqaralyq aqparat agenttiginiń ardageri, Qazaq redaktsııasynyń 1997-2011 jyldar aralyǵyndaǵy bas redaktory, belgili jazýshy, jýrnalıst, Qazaqstannyń eńbek sińirgen qaıratkeri Jarylqap Beısenbaıulyn sózge tartqan bolatynbyz.