Qazyǵurttyq sharýa jylyna 1 mıllıonnan astam gúl ósiredi
TÚRKІSTAN. KAZINFORM - Túrkistan oblysyndaǵy jylyjaılarda ósirilgen raýshan gúlder satylymǵa shyǵa bastady.
Qazyǵurt aýdanyndaǵy «Paseka-Bal» sharýa qojalyǵynyń tóraǵasy Azızbek Qasymov jylyjaı óndirisin damytyp otyr. 2010 jyly bastalǵan bıznes búginde órkendep keledi. Alǵashqyda qııar men qyzanaq egip kelgen sharýa, endi gúl ósirýdi qolǵa aldy.
Jalpy sharýa qojalyqqa tıeseli 18 gektar egistik jerdiń 2 gektaryna jylyjaı ornatylǵan. Sonyń tórteýinde gúl ósirilip jatyr.
«Jyl saıyn 1 mıllıonnan astam gúl qyrqamyz. Gúl baǵynda raýshannyń «Misty Bubbles», «Katalına», «Qara sıqyr» dep atalatyn úsh túri ósýde. Negizgi tutynýshylarymyz Shymkent qalasynyń turǵyndary. Sondaǵy kásipkerler ózderi kelip alyp ketedi, keı jaǵdaıda ózimiz jetkizip beremiz. Qazir 8 – naýryz merekesine oraı gúlderimiz jaqsy satylyp jatyr», - deıdi sharýa.
Azızbek Qasymovtyń sózinshe, bir ǵana jylyjaıdyń ózinen jylyna 400 myńǵa deıin gúl qyrqylady. Ónimdi Shymkent, Almaty, Qyzylorda qalalaryna jóneltedi. Gúlderdiń ortasha baǵasy - 150-170 teńge. Búginde jylyjaıda turaqty 15 adam jumys isteıdi. Olar gúlderdi kútip-baptap, tolyq ósip shyqqansha baqylap júredi.
«Gúl ósirýdiń ózindik tásilderi, qıyndyqtary bar. Balalar bul gúlderdiń tuqymdaryn Tashkentten alyp keldi. Sodan táýekelge bel býyp, ósirip jatyrmyz», - deıdi ol.
Aıta keteıik, Respýblıkada salynǵan jylyjaılardyń 70%-y Túrkistan oblysyna tıesili. Jalpy óńirdegi jylyjaılardyń jalpy kólemi - 1 640 gektar. Ótken jyly jylyjaılardan 140 myń tonna ónim jınalyp, respýblıka halqynyń 42%-y kókónispen qamtamasyz etilgen.
