«Qazyǵurt» jáne «Temir baba» jańa joǵary tehnologııalyq ótkizý pýnktteri ashyldy
ASTANA. KAZINFORM – Elimizde jańǵyrtýdan ótken eki avtomobıl ótkizý pýnkti paıdalanýǵa berildi. Atap aıtqanda, Ózbekstanmen shekarada ornalasqan «Qazyǵurt» jáne Túrkimenstanmen shekarada ornalasqan «Temir baba» pýnktteri. Atalǵan nysandardyń ashylýy Memleket basshysy Qasym-Jomart Toqaevtyń tapsyrmasyna sáıkes júzege asyrylyp jatqan shekara mańyndaǵy ınfraqurylymdy jańǵyrtý jónindegi memlekettik baǵdarlamanyń sheńberinde ótkenin aıta ketý kerek. Bul týraly Úkimettiń baspasóz qyzmeti habarlady.
«Qazyǵurt» ótkizý pýnktiniń resmı ashylýyna QR qarjy mınıstri Mádı Takıev pen Túrkistan oblysynyń ákimi Nuralhan Kósherov qatysty.
Qarjy mınıstri jańǵyrtý baǵdarlamasy Qytaı, Ózbekstan jáne Túrikmenstanmen aradaǵy shekaralarda ornalasqan barlyǵy 9 ótkizý pýnktin qamtyǵanyn atap ótti. «Qaplanbek», «Atameken», «Qaljat» jáne «Alakól» sııaqty birqatar nysandaǵy jumystar aıaqtalǵan. Al jyl sońyna deıin «Tájen», «Maıqapshaǵaı» jáne «Baqty» pýnktterin jańǵyrtýdan ótkizý kózdelip otyr.
Jóndeý jumystary kólik qozǵalysy men júk ótkizý protsesine kedergi keltirmeı júzege asyryldy. Osy maqsatta ýaqytsha qozǵalys shemasy uıymdastyrylyp, bul keptelistiń aldyn alyp, júk jáne jolaýshylar tasymaly úzdiksiz júrgizildi.
Jańa tehnologııalardy engizýdiń nátıjesinde pýnktterde shekaradan ótý ýaqyty 30 mınýtqa deıin azaıyp, ótkizý qabileti táýligine 1 000 kólikke deıin ulǵaıtyldy. Qazir jańartylǵan ótkizý pýnktteri arqyly kólik aǵyny 2,5 ese artty. Máselen, 2022 jyly shekarany 640 myń avtomobıl kesip ótse, búginde bul kórsetkish 1,5 mln-ǵa kóbeıdi.
«Qazyǵurt» ótkizý pýnkti – halyqaralyq standarttarǵa saı keletin zamanaýı tehnologııalyq keshen. Munda kólikti tirkeýdiń avtomattandyrylǵan júıesi, ozyq skanerleý jabdyqtary, salmaq-gabarıt ólsheý júıeleri, sondaı-aq rentgen-televızııalyq qondyrǵylar, «teplovızorlar» jáne radıatsııalyq baqylaý quraldary iske qosylǵan. Qozǵalys aǵyny jaıaý júrginshiler, jeńil jáne júk kólikteri dep arnaıy bólingen. Bul qaýipsizdikti arttyryp, qozǵalysqa jaıly jaǵdaı jasaıdy. Júk kólikteri úshin tehnıkalyq baqylaýdan toqtaýsyz ótýge múmkindik beretin avtomattandyrylǵan dálizder qarastyrylǵan.
Infraqurylymdy jańartýmen qatar mınıstrlik keden rásimderin tsıfrlandyrý boıynsha da qarqyndy jumystar júrgizip keledi. Aıtalyq, Keden aqparat júıesi kezeń-kezeńimen engizilip jatyr, onda tolyq ıntegratsııalanǵan tsıfrly keden júıesine kóshý qarastyrylǵan. Júıe ekspress-júktermen jumysty, taýarlardy esepke alýdy jáne vırtýaldy qoımalardy avtomattandyrdy. Qazir jasandy ıntellekt negizinde taýarlar men qyzmetterdi deklaratsııalaý modýlin iske qosý qolǵa alynǵan. Maqsat – elektrondy deklaratsııanyń tolyq tsıklin aıaqtap, 2026 jyldan bastap tıimdilikti baqylaý, saraptaý jáne baǵalaý úshin jańa modýlderdi engizý. Bul bıznes úshin jumysty aıtarlyqtaı jeńildetip, qyzmet kórsetýde jedeldete túsedi.
Budan bólek sáýirde Ózbekstanmen shekaradaǵy «Jibek Joly» ótkizý pýnktin aýqymdy jańǵyrtý bastalǵan bolatyn. Jańa keshen jalpy aýdany 10 myń sharshy metrdi alyp jatqan eki zamanaýı jolaýshylar termınalyn jáne avtokólikke arnalǵan biryńǵaı shatyrdy qamtıdy. Tıisti jumystar aıaqtalǵannan keıin 2026 jyly shildede ótkizý pýnktiniń qabileti táýligine 70 myń adamǵa deıin jáne 2 myń jeńil avtomobılge deıin ósedi dep kózdelgen.
Taǵy bir ınnovatsııalyq baǵyttardyń biri – Qytaımen birlesip qolǵa alynǵan «Baqty-Pokıtý» jobasy. Qytaı tarapy eki aýmaqta da tolyq avtomattandyrylǵan logıstıkalyq ortalyqtar qurýǵa shamamen $50 mln kóleminde ınvestıtsııa jumsamaq. Joba aıasynda júkterdi tasymaldaýǵa ushqyshsyz basqarylatyn elektr shattldaryn paıdalaný, «aqyldy» logıstıkany, AGV-termınaldardy, zarıadtaý stansalaryn engizý jáne búkil óńirdegi eń tehnologııalyq kólik dálizderiniń birin quryp, eki memlekettik tsıfrlyq júıeniń tolyq ıntegratsııasyn qamtamasyz etý josparlanyp otyr.
– Jańa ótkizý pýnktterin iske qosý – memlekettik organdardyń, mamandardyń, ınjenerlerdiń, qurylysshylardyń jáne shekara qyzmetiniń birlesken jumysynyń jemisi. Biz ekonomıkany damytýǵa áser etip, Qazaqstandy ashyq, senimdi jáne básekege qabiletti tranzıtti hab retinde aıqyndaıtyn zamanaýı, tehnologııalyq jáne jaıly ınfraqurylymdy qurýǵa mán berip kelemiz. Budan basqa ótkizý pýnktterin jańǵyrtý – Memleket basshysynyń Qazaqstannyń tranzıttik áleýetin arttyrýǵa baǵyttalǵan tapsyrmasyn iske asyrý baǵytyndaǵy júıeli qadam. Biz saýdany arttyryp, bıznestiń jumysyn jeńildetetin jáne Qazaqstandy aımaqtyń negizgi logıstıkalyq torabyna aınaldyratyn zamanaýı ınfraqurylym quryp jatyrmyz, - dedi Mádı Takıev.
Aıta keteıik, bıyl keden zańnamasyn buzǵandarǵa 534 ákimshilik is qozǵalǵan.