Qazyǵurt aýdanynda ınvestııa kólemi artyp, myńnan astam jańa jumys oryndary ashylady
TÚRKІSTAN. KAZINFORM - Túrkistan oblysynyń ákimi Darhan Satybaldynyń tóraǵalyǵymen aýdan, qalalardyń damý josparyn talqylap, bekitý jumystary jalǵasýda. Búgin Qazyǵurt aýdanynyń ákimi Ázızhan Ismaılov aýdannyń 2025-2030 jyldarǵa arnalǵan «Ekonomıkalyq ósýdi qamtamasyz etý boıynsha» strategııalyq bastamalardy júzege asyratyn jol kartasynyń negizgi baǵyttary men kórsetkishterin baıandady.
Qazyǵurt aýdanyn damytý úshin aýyl sharýashylyǵy jáne kásipkerlik baǵytynda jumys atqarylmaq. Ol úshin ınvestıtsııa tartý, jańa tehnologııalardy endire otyryp ónimdilikti arttyrý, jumyssyzdyq deńgeıin tómendetý jáne ekonomıkalyq ósimdi qamtamasyz etýge basym baǵyt berilmek.
Oblys ákimi tarapynan damý josparyn tolyqtyrý týraly tapsyrma berilip, sala basshylarynyń usynystary tyńdaldy.
«Qazyǵurt aýdanynda ónerkásipti arttyryp, aýyl sharýashylyǵyn damytý mańyzdy. Jumystardy shıratý kerek. Biraz jobalardyń júzege asý merzimi sozylyp ketti. Tabıǵaty qolaıly aımaqta qarqyndy baýdy damytyp, júzim sharýashylyǵyn qolǵa alý kerek. Tutas bir aýyldy gúl egetin etip damytýǵa bolady. Emdik týrızm úshin qolaıly aımaq. Naqty nátıje kerek. Ár aýdan ózin ózi qamtamasyz etetin deńgeıge jetý úshin ákim kúndelikti izdenip, tynbaı eńbektený kerek. Halyqtyń jaǵdaıyn jaqsartýǵa, jumys oryndaryn ashýǵa kúsh salý qajet. Shaǵyn jáne orta bızneske serpilis qajet. Bıýdjet qarjysyn ıgerýmen shektelmeı, shetelden iri ınvestorlar tartý kerek», – dedi Darhan Satybaldy.
Aýdan ákiminiń aıtýynsha, aýdanǵa tartylatyn ınvestıtsııa kólemi jyl saıyn artyp keledi. 2025-2030 jyldar aralyǵynda quny 55,1 mlrd. teńge bolatyn 45 jobany iske asyryp, 1 364 adamdy jumyspen qamtamasyz etý josparlanýda. Ónerkásip, aýyl sharýashylyǵy, týrızm, tamaqtaný jáne saýda salalarynda júzege asyrylatyn bolady.
Aýdannyń ınvestıtsııalyq ahýalyn jaqsartý úshin, 35 gektar jer aýmaǵyna «Qazyǵurt» ındýstrıaldy aımaǵy qurylyp, kásipkerlerge jaǵdaı jasalýda. Aldaǵy jyldary 26,4 mlrd. teńgege 12 jobany júzege asyrý josparlanýda.
Ónerkásip salasynda qubyr, gıdrotýrbına, keramıkalyq ónim, burǵylaý qondyrǵylaryn jasap shyǵaratyn, mal qaldyqtaryn óńdeý sekildi jańa jobalardy iske asyrý josparlanǵan. Aýyl sharýashylyǵy salasynda sút fermalary, mal soıý tsehy jáne mal bordaqylaý alańdary, balyq sharýashylyǵy, jylyjaı jobalaryn júzege asyrý, ónim saqtaý qoımasyn salý kózdelgen.
Aýdannyń aýyl sharýashylyǵy men ónerkásip ónimi kólemin arttyrý úshin Turbat aýylynda 60 gektar jer aýmaǵyna «Turbat agroındýstrıaldy aımaǵy qurý josparlanýda. Atalǵan aımaqta 3,8 mlrd. teńgege jylyjaılar boı kóterip, 416 adam jumyspen qamtý josparlanyp otyr.
