Qazyǵurt asýynda júk kóligi joldy jaýyp qaldy
TÚRKІSTAN. KAZINFORM – Qalyń qar túrkistandyq jolaýshylardy da ábigerge saldy.
Qazyǵurt asýynda júk kóligi joldan taıyp, joldy jaýyp qalǵan. Saldarynan asýda úlken keptelis boldy. Bul jaǵdaı boıynsha áleýmettik jelide de vıdeo tarap ketti.
Onda qatar tizilip turǵan kólikterdi kórsetken vıdeo avtory «Shymkent-Saryaǵash baǵytynda jol jabyldy. Qaladan Qazyǵurt, Saryaǵashqa qaraı jolǵa shyqpańyzdar, - deıdi.
Degenmen, polıtsııa qyzmetkerleri shuǵyl áreket etip, jol qozǵalysyn bir saǵat ishinde qalypqa keltirdi.
Túrkistan oblysy tótenshe jaǵdaılar departamentiniń málimetinshe, qazirgi tańda óńirdegi joldardyń barlyǵy ashylǵan. Kólik qozǵalysy qalypty.
Al, jelidegi aqparatqa oqyrmandar túrli pikirler qaldyryp jatyr.
Olardyń ishinde «Jol tazalanbaǵan», «Sonsha kólik jolǵa aqsha tóleıdi. Kamera qoıǵyshtar nege joldy tazalamaıdy», «Aqyly jol», «Tazalaýǵa bolmaıma» - degen jazbalar bar.
Aıta keteıik, budan buryn Túrkistan oblysynda júk kólikteriniń qozǵalysyna shekteý qoıylǵanyn jazǵan bolatynbyz.