Qazybek Nógerbek klassıkalyq shahmattan el chempıony atandy

ASTANA. KAZINFORM — Astanada klassıkalyq shahmattan el chempıonaty ótip, elordalyq Qazybek Nógerbek chempıon atandy. Bul týraly elorda ákimdigi jazdy.

Týrnırge elimizdiń eń úzdik reıtıngke ıe 14 shahmatshysy qatysty. Olardyń arasynda óner kórsetken elordalyq sportshylar da jeńis tuǵyrynan kórindi.

Áıelder arasynda elordalyq Merýert Kamalıdenova 8,5 upaı jınap, qola medal jeńip aldy. Al erler arasyndaǵy basty tartys Astana qalasynyń sportshysy Qazybek Nógerbek pen Denıs Mahnev arasynda órbidi. Qosymsha rapıd jáne blıts partııalary arqyly ótken sheshýshi oıynda Qazybek óz karerasynda alǵash ret klassıkalyq shahmattan el chempıony ataǵyn jeńip aldy.

Sondaı-aq, elordalyq Jandos Aǵmanov tartysty jarysty 4-orynmen aıaqtady.

Aıta keteıik, týrnırdiń jalpy júlde qory 20 mıllıon teńgeni qurady.

Buǵan deıin habarlanǵandaı, aqtaýlyq shahmatshy Qazaqstan tarıhyndaǵy eń jas halyqaralyq grossmeıster atandy.