Qazybek Isa óńirlerdiń damýy jóninde: jańa oblystardyń ashylýy kúshti serpin berdi
ASTANA. KAZINFORM – Ulttyq quryltaı jalpyulttyq dıalog alańyna aınaldy. Bul týraly Parlament Májilisinde Prezıdent Qasym-Jomart Toqaevtyń saıası reformalaryn iske asyrý taqyrybyn talqylaý kezinde depýtat Qazybek Isa málim etti.
- Elimizdi túbegeıli jańǵyrtý úshin aýqymdy reforma bastaǵan Prezıdent Qasym-Jomart Toqaevtyń Joldaýynan beri úsh jyldyń ishinde irgeli ózgerister jasaldy. Jalpyhalyqtyq referendým arqyly Ata zańǵa túzetýler engizildi. Parlamenttiń yqpaly artyp, esep beretin Úkimetke jaýapkershilik júkteldi. Konstıtýtsııalyq sot quryldy. Jańarǵan aýyl ákimderiniń 72 paıyzynyń úshten biri – buryn memlekettik qyzmette bolmaǵan jańa adamdar bolǵandyqtan, jańa lep keldi. Aýdandar men oblystyq mańyzdy qalalardyń 45 ákimi saılandy. Al bıyldan bastap barlyq aýdan ákimderin halyq tikeleı saılaıdy. Halyq saılaǵan ákim halyq aldynda esep beredi, ıaǵnı qarqyndy qaırat kórsetýge umtylady, - dedi Qazybek Isa.
Onyń paıymynsha, «Ádiletti Qazaqstannyń» bárine birdeı «Zań men tártip» qaǵıdaty bolmasa, qazirgi ózgerister bolmas edi. Dál osy qaǵıdat Prezıdenttiń basty jeńisi sanalady.
- Jas urpaqqa patrıottyq tárbıe berýde tamyrymyzdyń tereńdigin, tarıhymyzdyń kemeldigin kórsetetin Qazaq handarynyń babasy, Altyn Ordanyń atasy Joshy han qurǵan, Ulyq Ulystyń negizi qalanǵanyna 800 jyl tolýyn merekeleý ulttyq rýhymyzdy kóterip ketken eldik mańyzy erekshe zor rýhanı serpilis boldy. Álemdegi jer kólemi jaǵynan eń úlken, qýaty jaǵynan eń kúshti jáne eń uzaq jasaǵan alyp ımperııa Altyn Ordanyń naǵyz murageri - Aqordaly Qazaq Eli! Altyn Orda túgili Alashtyń atyn aıtqyzbaǵan keshegi otyz jyl artta qalyp, Joshy hanǵa Ulytaýda, Alash kósemderine astanadan bastap, kóptegen qalalarda asqaqtaǵan eskertkishteri ornatylyp jatyr. Bul isterdiń barlyǵy tikeleı Memleket basshysy Qasym-Jomart Kemelulynyń tikeleı pármenimen iske asyrylyp keledi, - dedi depýtat.
Onyń sózine qaraǵanda, Memleket basshysynyń bastamasymen qurylǵan, bıyl tórtinshi ret ótip, tórt qubylamyzdy túgendep jatqan Ulttyq quryltaı jalpyulttyq dıalog alańyna aınaldy. Ulttyq quryltaı - Qazaq tarıhyndaǵy eldiń eń mańyzdy máseleleri sheshiletin uly jıyn.
- 2022 jyly jańadan Abaı, Ulytaý jáne Jetisý oblystary ashyldy. Bul úsh oblystyń ashylýy osy aımaqtardyń damýyna kúshti serpin berdi. Óńirlerge jandanǵan ómir keldi. Endi Memleket basshysy keshe Quryltaıda Alash kósemderi Ahmet Baıtursynuly men Mirjaqyp Dýlatulynyń ómirge kelgen tarıhı ólkege basa nazar aýdaryp, tutas Torǵaı óńiriniń damýyna tyń serpin beretin aýqymdy jobany jarııalady. Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolynyń qurylysy bastalady. «Bir taý bir top kıikti asyraıdy» degendeı, bul kúshti kúre jol bir qaýym elge jumys taýyp beretin ekonomıkalyq serpin bolatyny anyq. Sonymen qatar «Túrkistan qalasynyń erekshe mártebesi týraly» zań qabyldandy. Túrkistanǵa erekshe mártebe berý mádenı biregeılikti nyǵaıtyp, qalany Túrki áleminiń rýhanı astanasyna aınaldyrady, - dedi Qazybek Isa.
Eske salsaq, jaqynda Prezıdent Torǵaı óńiriniń damýyna tyń serpin beretin aýqymdy joba týraly aıtty.
Budan buryn habarlanǵandaı, búgin Parlament Májilisiniń jalpy otyrysynda palata tóraǵasy Erlan Qoshanov «Prezıdent Qasym-Jomart Toqaevtyń saıası reformalaryn iske asyrý – memlekettik qurylystyń jańa tarıhı kezeńi» atty baıandama jasady.