Qajymuqannyń rólin somdaǵan Áleýhan Bekbolatuly ómirden ozdy
ASTANA. QazAqparat - Orasan kúshtiń ıesi, kúrestiń birneshe túrinen álem chempıony atanǵan tuńǵysh qazaq alyby, teńdessiz ónerimen jer sharyn aralaǵan, 28 memlekette kúreske túsip, 56 medal oljalaǵan áıgili Qajymuqan balýannyń rólin somdaǵan belgili akter Áleýhan Bekbolatuly keshe 60 jasynda júrek aýrýynan kóz jumdy.
Dúnıe júziniń chempıondary Ivan Poddýbnyı, Ivan Shemıakın, Aleks Aberg, Ivan Zaıkın, Georg Lýrıh, Georg Gakkenshmıdt, Pol Pons, Veıland Shýlts syndy jampozdarmen qatar júrgen qazaqtyń ataqty balýanynyń rolinde oınaý ekiniń biriniń qolynan kele bermeıdi.
Áleýhan Bekbolatuly Qyzylorda oblysy Jańaqorǵan aýdanynda 1955 jyly dúnıege kelgen. Ol - Qajymuqan kınosyna som deneli, suńǵaq boıly jáne kúreske beıimdiliginiń arqasynda 200-den astam úmitkerlerdiń ishinen tańdap alynyp, Qajymuqan rolin sátti somdaǵan akterlardyń biri.
Marqumdy aqtyq saparǵa shyǵaryp salý rásimi búgin 12.30-da Qaraǵandy trassasyndaǵy Er Kókshe kóshesinde «Raıymbek» dámhanasynda ótedi. Kúnsultan Otarbaı
