Qajymuqan men Shubar aýyldaryna qatynaıtyn avtobýstar eldi meken ishine kiretin boldy
ASTANA. QazAqparat – Búginnen bastap elorda irgesinde ornalasqan Qajymuqan jáne Shubar aýyldaryna qatynaıtyn qoǵamdyq kólikter eldi mekenderdiń ishine kirip, aýyldaǵy aıaldamalarǵa toqtap júredi. Bul týraly QazAqparat tilshisi «City Transportation Systems» kompanııasyna silteme jasap habarlaıdy.
«5 qarashadan (senbi) bastap, kóliktik qyzmetti jaqsartý maqsatynda qala mańyna qatynaıtyn № 310 jáne № 318 baǵdarlarynyń qozǵalys syzbasy ózgeredi. Atap aıtqanda, № 310 baǵdar Qajymuqan aýylyna kirip júredi jáne aýyl ishindegi aıaldamalarǵa jańa qozǵalys syzbasyna sáıkes qyzmet kórsetetin bolady. Sonymen qatar, № 318 baǵdaryndaǵy avtobýstar Shubar aýylyna kirip júretin bolady jáne aýyl ishindegi aıaldamalarǵa qozǵalys syzbasynda sáıkes qyzmet kórsetetin bolady», - delingen kompanııa taratqan habarlamada.
Qosa ketsek, buǵan deıin atalǵan kompanııa Astana avtobýstarynda 1 myńnan astam júrgizýshi jetispeıtinin málimdegen edi.
Ashyq kózderden alynǵan foto
