Qajylyqqa tegin aparamyz dep jınap alynǵan tólqujattar ózge maqsattarda paıdalanylýy múmkin - QR Din isteri komıteti

ASTANA. QazAqparat - QR MSM Din isteri komıteti ǵalamtorda taraǵan tegin qajylyq rásimine shaqyrý derekterine qatysty resmı málimdemesin jarııalady.

QR Mádenıet jáne sport mınıstrliginiń Din isteri komıteti ınternet jelisi arqyly Saýd Arabııasy Koroldigindegi Mekke jáne Mádına qalalaryna tegin qajylyq uıymdastyrýdy usynatyn belgisiz toptardyń qyzmetterine aldanyp qalýyńyz múmkin ekendigin eskertedi.

Birinshiden, elimizdegi qajylyq jumystary Qazaqstan musylmandary dinı basqarmasy (QMDB) arqyly Saýd Arabııasy tarapynan jyl saıyn arnaıy bólinetin kvota negizinde júzege asyrylady.

Qajylyqty uıymdastyrýmen tikeleı QMDB bekitken týrıstik kompanııalar aınalysady. Jalpy, bizdiń elimizde QMDB arqyly qajylyq rásimdi ótkizýge tegin kvota bólinetini jáne QMDB bekitken fırmalardyń mundaı jarnama taratatyny týraly aqparat bolǵan joq. Al qandaı da bir jergilikti nemese shet eldik kompanııalar arnaıy bólinetin kvotasyz qajylyq sapardy uıymdastyrýy múmkin emes.

Ekinshiden, azamattardy qajylyqqa tegin aparamyz dep aldyn ala jınap alynǵan tólqujattar ózge maqsattarda paıdalanylýy, qazaqstandyqtar osyndaı alaıaqtyq áreketterdiń saldarynan zardap shegýi múmkin.

Osyǵan oraı, qajylyqqa barýǵa nıet bildirgen azamattar belgisiz adamdardyń nemese uıymdardyń aldaýyna túsip qalmaýlary úshin QMDB-nyń baspasóz quraldarynda tizimderi bekitilgen týrıstik kompanııalarǵa habarlasqandary jón. Osy rette qajylyqqa barýǵa nıettengen árbir azamattyń tizimderi bekitilgen kompanııalarǵa tólqujatyn óz qolymen ákelip ótkizgenderi durys.

Jalpy, ártúrli «tegin» shaqyrtýlarǵa saqtyqpen qarap, kıeli jerlerge qajylyqqa barýdy uıymdastyratyn kompanııalardy tańdaýǵa úlken jaýapkershilikpen qaraǵan abzal.