Qajylyqqa bólingen kvota 4 myńǵa deıin artty

NUR-SULTAN. QazAqparat - Bıyl Qazaqstannan 4 myń adamǵa qajylyq paryzdy óteýge ruqsat berildi. QazAqparat bul týraly Qazaqstan musylmandary dinı basqarmasynyń (QMDB) saıtyna silteme jasap habarlaıdy.

Búgin QMDB ǵımaratynda Qazaqstan qajylyq mıssııasy ókilderiniń alǵashqy otyrysy ótti.

Málim bolǵandaı, bıylǵa bólingen 4 myń qajylyq oryn konkýrs negizde iriktelgen 14 týroperator arasynda bólindi. Qajylyqqa barýǵa nıet etken qazaqstandyqtar osy týroperatorlarǵa júgine alady. Qazir olar tirkeý jumystaryn bastap ketti.

Otyrys barysynda qajylyq kezinde atqarylatyn jumys jospary talqylanyp, uıymdastyrý máseleleri pysyqtaldy. Sondaı-aq qajylardyń densaýlyǵy men qaýipsizdigi de mıssııanyń baqylaýynda bolatyny aıtyldy.

QMDB tóraǵasynyń orynbasary Ershat Ońǵar mıssııa ókilderiniń mindetin shegelep, bes paryzdyń biri sanalatyn qajylyqqa muqııat daıyndyq jasaýdy tapsyrdy.

Aıta keteıik, buǵan deıin Qazaqstannan 3 myń adamǵa qajylyq paryzdy óteýge ruqsat berilgeni týraly aıtylǵan bolatyn.