Qajylyqqa barý úshin qaryz alý durys pa

NUR-SULTAN. QazAqparat – Qaryz alyp nemese kómek surap qajylyqqa barýdy sharıǵat qoldamaıdy. Bul týraly Qazaqstan musylmandary dinı basqarmasy tóraǵasynyń birinshi orynbasary, naıb-múftı Naýryzbaı Ótpenov ortalyq kommýnıkatsııalar qyzmetinde ótken brıfıngte aıtty, dep habarlaıdy QazAqparat tilshisi.

Naıb-múftı Naýryzbaı Ótpenov qajalyq paryzy týraly aqparat bere kele, oǵan neshe ret barý kerek degen saýalǵa toqtaldy.

«Kez kelgen musylman qajylyqqa barǵysy keledi. Oǵan barýdy armandaıdy. Qajylyq kimge paryz ekenin aldyn ala bilip alǵanymyz jón. Qasıetti Quranda «Kimniń jaǵdaıy kelse, sol adam ómirinde bir ret qajylyq jasasyn» degen. ıAǵnı kez kelgen jaǵdaıy bar musylmanǵa ómirinde bir ret qajylyqqa barý - paryz. Jaǵdaıy degende áleýmettik jaǵdaıymen qosa densaýlyǵy da aıtylyp tur. Árıne, odan keıin taǵy baram dese, onyń da esh ábestigi joq», - deıdi din ókili.

Ol sondaı-aq, qajylyqqa barý úshin keı adamdardyń qaryzdanyp jatatynyn aıtty.

«Keı adamdar qajylyqqa barý úshin bir-birinen qaryz nemese kómek suraıdy. Sharıǵat muny qoldamaıdy. ıAǵnı, jaǵdaıy kelgen adam ǵana qajylyqqa barýy kerek. Qajylyq degenimiz – qulshylyq. Ol baryp demalatyn oryn emes. Bolmasa el kórip keletin jaı bir sapar emes. Qajylyqqa baryp kelip, bir dárejege kóterilem deıtindeı mansap ta emes. Osyny bilgen jón», - dedi Naýryzbaı Ótpenov.

Eske salsaq, jyl basynda qazaqstandyqtardy qajylyqqa aparatyn eki áýe kompanııasy bekitilgen bolatyn. Bıyl óńirler arasynda Túrkistan oblysynan qajylyqqa barýǵa nıet bildirýshiler sany kóp.

Ortalyq kommýnıkatsııalar qyzmetinde ótken brıfıngte Qazaqstan musylmandary dinı basqarmasy tóraǵasynyń birinshi orynbasary Naýryzbaı Ótpenov qajylyq vıza kimderge berilmeıtinin túsindirdi.