Qajylyqqa barý qujattaryn qabyldaý 25 tamyzǵa deıin jalǵasady
ASTANA. QazAqparat - Barsha musylmannyń asyl armany bolǵan uly qulshylyq, qasıetti qajylyq saparyna da sanaýly kúnder qaldy. Qazaqstan musylmandary dinı basqarmasy qajylyq paryzyn óteýge nıet bildirgen otandastarymyzdy Allanyń qonaǵy bolýǵa shaqyrady, dep habarlaıdy QMDB-nyń baspasóz qyzmetinen.
«Bıyl tuńǵysh ret Astana, Almaty, Shymkent qalalarynan Jıdda (ıaǵnı, Mekke qalasyna) baǵyty boıynsha tikeleı reıs ashyldy. Bul - Qazaqstan qajylary úshin mol múmkindik, úlken jeńildik. Paıǵambarlar atasy Ibrahımniń (ǵ.s.) izi qalǵan, qutty meken, qasıetti jer, Jaratýshynyń nury jaýǵan Mekke men Mádına shaharyn zııarat etýge asyǵaıyq, baýyrlar!», delingen habarlamada.
Bıylǵy qajylyq maýsymy qyrkúıek aıynyń 11-inen bastalyp, qazan aıynyń 15-inde aıaqtalady. Al 24 qyrkúıekte ulyq meıram Qurban aıt merekesi bastalady.
Saýd Arabııasy Qajylyq mınıstrliginiń bekitken erejeleri boıynsha qajylyq saparyna qatysty qujattardy qabyldaý 25 tamyzǵa deıin jalǵasady. Bıylǵy qajylyq maýsymynyń eń qysqa merzimi - 13 kún. Budan da uzaq merzimdi tańdaıtyn azamattar úshin 28 kúnge josparlanǵan arnaıy reıster ashylǵan.
Jyldaǵy dástúr boıynsha QMDB Qajylyq Mıssııasynyń músheleri - bilikti, joǵary sanattaǵy dárigerler qajylarymyzdyń densaýlyǵyn 24 saǵat boıy baqylasa, 30-dan astam dintanýshy-ǵalymdar men tájirıbeli ımamdar uly saparda týyndaǵan suraqtarǵa jaýap berip, dinı rásimderdiń durys atqarylýyna jiti kóńil bóledi.
«Qajylyq - musylman úmbetiniń birligin aıqyndaıtyn, barsha adamzatty uly maqsatqa úndeıtin, pendeni rýhanı kemeldenýge bastaıtyn mol múmkindikter men sansyz saýaptar maýsymy. Jaratýshy Iemiz qajylyq saparyn abyroımen atqaryp, Otanymyzǵa saýap arqalap oralýdy jazǵaı!», dep atap ótilgen habarlamada.
