Qajylyqqa baratyn adamdardy 3 áýe kompanııasy tasymaldaıtyn boldy
Qajylarymyzǵa qolaıly jaǵdaı jasaý maqsatynda QMDB qazaqstandyq jáne sheteldik áýekompanııalar arasynda 4000 qajyny tasymaldaý úshin ashyq konkýrs jarııalaǵan bolatyn.
Konkýrsqa Kýveıttiń «Jazeera», Birikken Arab Ámirliginiń «Air Arabia», Túrkııanyń «Turkish Airlines», sondaı-aq Saýd Arabııasynyń «Flynas» áýe kompanııalary qyzyǵýshylyq bildirip, tıisti qujattaryn ótkizdi.
Osy rette, qajylyq oryndaryn alǵan 18 qazaqstandyq týroperator arasynan arnaıy komıssııa qurylyp, atalǵan áýe kompanııalar ókilderimen tıisti kelissózder júrgizildi.
Básekelestikke túsken «Flynas» áýe kompanııasy da kelissózder nátıjesinde arzan baǵa usyndy. Atalmysh komıssııa músheleri 3 áýe kompanııasyn tańdap aldy. Atap aıtqanda tikeleı reısteri arqyly qajylarymyzdyń qasıetti mekenge jyldam jetýi úshin «Flynas» áýe kompanııasy tańdaldy. Al, arzan áýe bıletin qalaǵan týroperatorlar úshin «Jazeera» áýe kompanııasy qyzmet kórsetetin boldy. Álemniń ozyq úlgide qyzmet kórsetetin áýe kompanııalarynyń qataryna kiretin «Turkish Airlines» áýe kompanııasy jaılylyqty qalaǵan qajylarymyz úshin tańdaldy.
QMDB áýe kompanııalary arasyndaǵy konkýrs pen bıylǵy 4000 qazaqstandyq qajyny tasymaldaıtyn áýe kompanııalarynyń tańdalǵandyǵy jaıly Saýd Arabııa Koroldiginiń Qajylyq jáne umra mınıstrligi men Koroldiktiń Azamattyq avıatsııa Bas basqarmasy tarapyna dıplomatııalyq arnalar arqyly resmı habarlanǵan bolatyn.
Qazaqstan tarapynan «Qajylyq-2023» maýsymyn uıymdastyrý boıynsha arnaıy issaparmen barǵan Qazaqstan musylmandary dinı basqarmasynyń tóraǵa orynbasary, naıb múftı Ershat Ońǵar men Qazaqstannyń Jıdda qalasyndaǵy Bas konsýly Qospanov Rýslan Tobyluly al, Saýdııa tarapynan Koroldiktiń Azamattyq avıatsııa Bas basqarmasynyń (GACA) Qajylyq jáne umra isteri boıynsha basqarma basshysy Mazen Ahmad Bazhaır myrza qatysqan kelissózder júrgizildi.
Kelissóz barysynda qazaqstandyq 18 týroperatormen qajylyqqa attanatyn 4000 otandasymyzdy QMDB ótkizgen konkýrs negizinde saýdııalyq «Flynas», kýveıttik «Jazeera», túrkııalyq «Turkish Airlines» áýe kompanııalary tasymaldaıtyny pysyqtaldy. Qajylarymyz Astana, Almaty, Túrkistan jáne Aqtaý qalalarynan ushaqqa otyryp, Mekke (Jıdda) jáne Medıne qalalaryna jetkiziletin bolady.
