Qajylyqqa baratyn 2 myń adamǵa menıngıtke qarsy ekpe jasalady

ASTANA. QazAqparat -  Qajylyqqa baratyn 2 myń adamǵa menıngıtke qarsy ekpe jasalady. Bul týraly búgin elimizdiń bas memlekettik sanıtar dárigeri Jandarbek Bekshın aıtty, dep habarlaıdy QazAqparat tilshisi.

«Qajylyqqa baratyn adamdardyń barlyǵyna da menıngokok juqpasyna qarsy ekpe jasalady. Aǵymdaǵy jyly da biz qajylyqqa baratyn 2 myń adamǵa ekpe jasaýdy josparlap otyrmyz», - dedi ol Úkimet otyrysynan keıin BAQ ókilderine.

Sonymen qatar ol Almatyda birneshe menıngıt oqıǵasynyń tirkelýine baılanysty barlyq mádenı-buqaralyq sharalar, ásirese jabyq, aýasy baıaý almasatyn orynjaılardaǵy sharalarǵa shekteý qoıylǵanyn aıtty.

«Qazir Oraza aıy. Bizdiń kóptegen dindarlarymyz namazǵa jáne aýyzasharǵa barady. Osy rette búkil elimizdegi meshitterdiń ımamandaryna dindarlarǵa barynsha jaıly jaǵdaı jasaýǵa keńes beremiz», - dedi Janbarbek Bekshın.

Onyń aıtýynsha, barlyq mádenı-buqaralyq sharalardy múmkindiginshe taza aýada ótkizgen jón.


Basty foto: mpz.brovary.org