Qajylyqqa attanǵan myńǵa jýyq qazaqstandyq Mekkege jetti

NUR-SULTAN. QazAqparat - Qazaqstandyqtardyń qajylyq mıssııasy óz jumysyn bastady, dep habarlaıdy QazAqparat tilshisi.

«Qazaqstannyń atynan kelip otyrǵan soń artta qalǵan búkil el bizge qaraıdy. Bul - jaýapkershiligi mol jumys. Qajylyq ońaı emes. Árbir sapar synaqqa toly bolatyny ras. Endigi mindet - ózimizge júktelgen isti abyroımen atqaryp shyǵý. Qajylardyń qulshylyq amaldaryn jeńil ári qıyndyqsyz atqarýyna barymyzdy salamyz», - deıdi Qazaqstannyń qajylyq mıssııasynyń tóraǵasy, naıb-múftı Alaý Ádilbaev.

Qajylyq sapardyń alǵashqy otyrysynda mıssııa tóraǵasy qajylyqtyń jumys josparyn bekitip, uıymdastyrý máselesin sóz etti.

«Elimizden kelgen qajylarymyzdyń densaýlyǵy, qaýipsizdigi de mıssııanyń baqylaýynda bolmaq. Óz kezeginde mıssııa ókilderi qajylyq kompanııalardyń jumysyn baqylap, sapasyn arttyrýǵa kúsh salady», - dedi ol.

Qazaqstan musylmandary dinı basqarmasynyń deregine súıensek, búginde Qazaqstannan Saýd Arabııasyna 5 reıs jetip, 969 qazaqstandyqtyń qasıetti Mekkege tabany tıdi.

Eske sala keteıik, buǵan deıin qazaqstandyqtardyń alǵashqy legi qajylyq saparǵa attanǵan bolatyn.