Qajylyq jasaý kezinde dári-dármekterdi alyp kirýdi arnaıy erejeler boıynsha resimdeý kerek
ASTANA. 17 sáýir. QazAqparat - Saýd Arabııasy Koroldiginiń Astanadaǵy elshiligi Qazaqstan Respýblıkasy Din isteri agenttigine dıplomatııalyq arnalar arqyly Saýd Arabııasy Koroldigine qajylyq jasaýǵa barǵan azamattardyń jeke qoldanýǵa arnalǵan dári-dármekterdi alyp kirý erejeleri týraly aqparatty joldady,
dep habarlaıdy QR Din isteri agenttigi.
Erejelerde tirkelgen orny boıynsha medıtsınalyq mekememen bekitilgen dárigerdiń naqty qorytyndysy nemese dáriger jazyp bergen dáriqaǵazdyń (retsept) berilgen kúni Saýd Arabııasyna kelý kúninen 6 aıdan aspaǵan jaǵdaıda dári-dármekterdi alyp kirýge ruqsat beriledi dep kórsetilgen.
Sondaı-aq, medıtsınalyq qorytyndynyń quramynda emdelýshiniń jeke málimetteri, dıagnozy, em qabyldaý kýrsy jáne onyń uzaqtylyǵy, dárigerdiń usynystary men dáriniń patenttelgen ataýy kórsetilýi qajet.
Sonymen qatar, emdelýshiniń dári-dármekti tek ózi qabyldaıtyndyǵy jáne qabyldaý jaýapkershiligin óz moınyna alý jónindegi mindettemesi jáne medıtsınalyq qorytyndyǵa qosymsha retinde em qabyldaýshynyń jeke basyn kýálandyratyn qujatynyń kóshirmesi bolýy tıis. Eger dári-dármekter emdelýshiniń ózinde emes, onyń bir týysynda bolǵan jaǵdaıda, alyp júrýshiniń jeke basyn rastaıtyn qujatynyń kóshirmesin qosymsha tirkeý qajet.
Jeke qoldanýǵa arnalǵan dári-dármekterdi Saýd Arabııasy Koroldigi aýmaǵyna 30 kún nemese Saýd Arabııasy Koroldiginde bolý ýaqyty (30 kúnnen az) aralyǵyna jetetin mólsherde alyp kirýge ruqsat etiledi. Em qabyldaý merzimi aıaqtalǵannan keıin nemese emdelýshi belgili bir sebeptermen emdelýden bas tartqan jaǵdaıda, dári-dármekterdiń qaldyqtary mindetti túrde joıylýy tıis.
