Qajylyq saparyna qatysty birqatar shekteýler qoıyldy
ASTANA. 29 qarasha. QazAqparat - Qajylyqqa barý merzimine qatysty shekteý qoıylatyn boldy. Endigi jerde sheteldik tólqujatyna vıza belgisi soǵylǵanyna qaramastan qajylar tek bes jylda bir ret barý múmkindigine ıe bolady, dep jazady muslim.kz. Saýd Arabııasy koroldiginiń bıligi saýsaq izderi boıynsha qajylardy esepke alyp jatqanyn aıta ketý kerek.
Jańa ereje arnaıy baǵdarlama boıynsha qajylyq paryzyn ótegisi keletin qajylarǵa da qatysty. Osyǵan baılanysty qajylardyń eki tizimi jasalatyn boldy. Birinshi tizimge sońǵy bes jylda qajylyqqa barmaǵandardyń aty-jóni enetin bolsa, kelesi tizimde sońǵy bes jylda qajylyq paryzyn ótegenderdiń esimi esepke alynady.
Ekinshi tizimge engen qajylar vızany Saýd Arabııasy elshiligi alǵashqy tizimdi qaraǵannan keıin ala alady. Bul tártip qasıetti saparǵa alǵash attanǵandarǵa qajylyq paryzyn óteýine múmkindik beredi.
