Qajylyq saparǵa shyqqandar alǵash ret Astanadan tikeleı ushaqpen attandy

Bul týraly «Nur Astana» Ortalyq meshitiniń naıb-ımamy Tólebı Ospan málim etti.

Musylmandyq paryzdardyń biri - qajylyqty óteýdi nıet etken musylmandar Astana halyqaralyq áýejaıynan saparǵa ústimizdegi qazan aıynyń 22-sinen 23-ine qaraǵan túni shyqty.

Túngi saǵat 11 shamasynda Astana áýejaıy saparǵa shyǵýshylar men shyǵaryp salýshylarǵa lyq toldy. Súıikti paıǵambarymyz (s.a.s) ómir súrip, aýasyn jutyp, topyraǵyna aýnaǵan qasıetti mekenderge sapar shegip bara jatqandyqtardyń júzderinde úlken qýanysh boldy.

Qajylyqqa Astana qalasynan tikeleı ushýǵa táýekel etken alǵashqy kompanııa - «Ansar-Krýız» qajylyq kompanııasy. Astana qalasynan shyǵatyn kompanııa ushaqtary aldymen Ystambulǵa, odan Medıne qalasyna ushatyn bolady. Qaıtar baǵyttary da osylaı bolmaq.

«Astanalyqtar men soltústik aımaqtardyń musylmandary úshin bul asa qolaıly. Óıtkeni, arqadan arqalanyp barǵan olar Almaty qalasynda bir-eki kún saryla tosyp júrip ushady. Árıne, bul ásirese úlken kisiler úshin edáýir qıyndyqtar týǵyzyp kelgeni sózsiz», - deıdi T.Ospan.

Bolashaq qajylarǵa sát sapar tileý úshin QMDB-nyń naıb múftıi, «Nur Astana» ortalyq meshitiniń Bas ımamy Qalıjan qajy Zańqoev áýejaıǵa arnaıy keldi. Ol saparǵa shyǵyp bara jatqan aqjaýlyqty analar men aqsaqaldy qarııalarǵa qajylyq saparynyń mán-mańyzyn, sapardyń ózine tán qıynshylyqtary men mashaqatyna tázimdilik tanytý kerektigin aıtty.

«Qajylyq - saıahat sapary emes, bul - qulshylyq sapary. Sondyqtan bul saparda barynsha sabyrly bolyp, árbir qulshylyqty qulshynyp oryndaý kerek. Kemedeginiń jany bir demekshi, osy kompanııamen bara jatqandar bir-birlerińizge járdem berip, qaraılasyp júrińizder. Ásirese, myna atalarymyz ben apalarymyz boıynda qýaty bar jastarǵa amanat. Paıǵambarymyz (s.a.s) óziniń bir hadısinde aıtqan: Allaǵa jaqyndatatyn eki jaqsy is bar. Onyń biri Allaǵa ıman keltirý bolsa, ekinshisi bir adamǵa járdem berý», - dedi Q.Zańqoev.

«Qabyl bolǵan qajylyqtyń qaıtarymy tek qana jannat»,- degen Muhammed paıǵambarymyz (s.a.s). Sol sebepti, qajylyq amaldaryn tolyq jáne shyn yqylaspen oryndaýǵa tyrysyńyzdar. Sizder arqyly qasıetti saparǵa attanǵan barsha qazaqstandyq musylmandarǵa sát sapar tileımiz», - dep aq batasyn berdi.

Aıta keteıik, búgingi kúni Astana qalasyndaǵy barlyq meshitterde qajylyq kýrstar uıymdastyryldy. Kýrsta qajylyqqa barýǵa nıet etken kisilerge sapardyń mán-mańyzy jáne jasalatyn ǵıbadattary jaıynda maǵlumattar berilip, aıtylatyn duǵa-tilekter jattatylady.