Qajylyq kompanııalarynyń qyzmet sapasyn tekserý jumystary bastaldy
ASTANA. QazAqparat - Búgin Mádına qalasynda Qazaqstan Qajylyq Mıssııasynyń Medıne qalasyndaǵy jaýapty ókili qajylyq kompanııalarynyń qyzmetimen, qonaqúılerdegi qajylardyń ahýalymen, tynys-tirshiligimen tanysty, dep habarlaıdy QMDB baspasóz qyzmetinen.
Tekserý jumystary «Qyzmet saıahat», «Hıkmet trevl», «ıAssaýı», «Atlas» qajylyq kompanııalarynan bastaldy. Kompanııalardyń qaýipsizdik talaptaryn muqııat saqtaý jáne servıstik qyzmet kórsetý sapasyna tekserý júrgizýdi josparlaýda.
«Qajylyq mıssııasy men kompanııalardyń jumysyna kóńilim tolady. Joǵarǵy deńgeıde qyzmet kórsetip jatyr. Dárigerler medıtsınalyq kómek kórsetse, din ǵalymdary sharıǵat suraqtaryna jaýap berýge qashan da daıyn. Qonaq úılerdiń taǵamdaryda sapaly. Mádına qalasyndaǵy tarıhı oryndardy aralatyp, zııarat jasatty. Buryn aıaǵym aýyratyn qazir múldem aýyrmaıdy, kóńil kúıimde jaqsy», - dedi 63 jastaǵy Jumakúl Mahanqyzy.
Qajylarmen jeke kezdesýlerde olardyń densaýlyǵy, ýaǵyzdardyń aıtylýy, dinı aǵartý-túsindirý jumystarynyń júıeli júrgizilýi, ókilderiniń qyzmet sapasy, qonaqúılerdegi tazalyqtyń saqtalýy, azyq-túlik pen tamaqtyń medıtsınalyq talaptarǵa saı bolýy, t.b. jaǵdaılarǵa asa mán berildi.
«Sizderge Bas múftı Erjan qajy Malǵajyulynyń sálemin jetkizgim keledi. Din basy qajylarymyzǵa qamqor bolýdy, dinı rásimderdi durys atqarýǵa kóńil bólýimizdi tapsyrǵan bolatyn. Ár qajyǵa sapaly qyzmet kórsetý - Qajylyq Mıssııasynyń, qajylyq kompanııa jetekshileriniń mindeti. Qandaıda bir usynys-pikirlerińiz bolsa, biz ony júzege asyrýǵa árqashan daıynbyz», - dedi QMDB-nyń tóraǵasy, Bas múftı keńesshisi Qýat Raev.
Aıta ketsek, ár qajylyq kompanııalarynyń quramynda bilikti dárigerler medıtsınalyq kómek kórsetip, teologtar túsindirý jumystaryn júrgizedi. Sonymen qatar, Qajylyq Mıssııasynyń quramyndaǵy medıtsına salasynyń 4 bilikti mamany, Dinı basqarmanyń 7 dintanýshy ǵalymy qajylarǵa qyzmet kórsetýde. 
