Qajylarǵa laıyqty qyzmet kórsete almaǵan fırmalar sazaıyn tartatyn boldy
ASTANA. 23 sáýir. QazAqparat - Saýd Arabııasynyń qajylyq isteri jónindegi mınıstri Bandar Hadjar Qajylyq jáne Umra kezinde Allah meımandaryna tıisti deńgeıde qyzmet kórsete almaǵan kompanııalarǵa qatań jaza qoldanylatynyn eskertip, málimdeme jasady. Bul jaıynda muslim.kz habar taratty.
Mınıstrdiń mundaı málimdeme jasaýyna qajylardyń Qajylyq komıtetine túsirgen shaǵymy túrtki boldy. Atalmysh komıtet 58-shi zańǵa sáıkes (jekelegen qajylarǵa qyzmet kórsetý) koroldiń jarlyǵymen hıjra jyl sanaýy boıynsha 28/10/1426 jyly quryldy.
Komıtet tıisti deńgeıde qyzmet kórsete almaǵan kompanııalardy qajylarǵa keltirgen qolaısyzdyǵy úshin ótemaqy tóleýge mindettedi. Komıtet Qajylyq týraly zańdy belden basqan kompanııalardyń jolyn kesý úshin 27 túrli qaýly qabyldady. Óz qyzmetine salǵyrt qaraǵany úshin 15000 jáne 100000 SR aralyǵynda aıyppul salýdan bastalatyn qatań sharada kompanııanyń qyzmetin toqtatyp, lıtsenzııasyn qaıtaryp alýǵa deıin jaza qarastyrylǵan. Osy ýaqytqa deıin 16 kompanııa zań aldynda jaýap bergen kórinedi.
Komıtet qajylyq isteri, ishki ister jáne saýda ári kommertsııa mınıstrlikteriniń ókilderinen jasaqtaldy. Bandar Hadjar óz sózinde baqylaý-tergeý komıtetiniń jáne Qajylyq isteri jónindegi mınıstrliktiń qadaǵalaý, zertteý jumystaryna tartylǵan ózge komıtetterdiń de jumysyna oń baǵa berdi.
