Qajyǵumar Shabdanulynyń “Qylmysy” qazaq ádebıetindegi alǵashqy 6 tomdyq roman – Qazaqstannyń halyq jazýshysy Qabdesh Jumadil
ALMATY. Qańtardyń 27-si. QazAqparat /Erlik Erjanuly/ - Ómiriniń 44 jylyn túrmede ótkizip halqynyń qasiretin romanǵa aınaldyrý Qajyǵumar Shabdanulynyń úlken erligi. Bul búgin Almatyda belgili jazýshy, aqyn, dramatýrg Q. Shabdanulynyń 6 tomdyq "Qylmys" romanyn Qazaqstannyń Memlekettik syılyǵyna usyný týraly baspasóz máslıhatynda aıtyldy,
dep habarlaıdy QazAqparat.
"Bodan, kiriptar bolyp, bireýdiń bosaǵasynda júrgen soń ekinshi bir mekeniń túrme bolady. Ult úshin kúresken, ulttyń azattyǵy úshin kúresken adamǵa, erkin oı-pikir úshin kúresken adamdardyń qashan da ekinshi mekeni túrme. Qajekeńniń taǵdyry sony áıgileıdi. Bul kisi jaı jatpaǵan. 6 tomdyq "Qylmys" romanynyń alǵashqy ekeýin bostandyqta, qalǵanyn túrmede otyryp jazǵan. Ony shamnyń, terezeniń jaryǵymen tildeı qaǵazǵa bólip-bólip jazyp, kelgen-ketken kisiden syrtqa jiberip, keıin ony nómirlep romanǵa aınaldyrý úlken azapty jumys. Qajekeńniń bastan keshirgenderi ádebıetke degen qushtarlyq pen bolashaqqa degen senimniń aıǵaǵy", deıdi Qazaqstanyń halyq jazýshysy, Memlekettik syılyqtyń ıegeri Qabdesh Jumadil. Qalamgerdiń aıtýynsha, bul shyǵarma Qytaıdan Qazaqstanǵa kóshken adamnyń kóshi men jolaýshynyń dorbasynyń túbinde jáne taǵy basqa da túrli joldarmen Almatydaǵy Qabdesh Jumadilge tısin degen adrespen ákelindi. Qazaq ádebıetine qosylǵan alǵashqy 6 tomdyq bul roman únsiz-túnsiz, eleýsiz qaldyratyn qatardaǵy shyǵarma emes.
"Bizdiń rýhanııatymyzǵa úlken áser etetin mundaı kitaptar kóp jazylyp jatqan joq. Qazir ulttyń 50 jyldyq qasiretin jazyp otyrǵan qaısymyz bar. Muhtar Áýezovten keıin qaısymyz jazdyq. Ony eleýsiz qaldyrý eldigimizge de syn bolatyny kúmánsiz", deıdi áriptesiniń pikirin quptaǵan Qazaqstanyń halyq jazýshysy, Memlekettik syılyqtyń ıegeri Orazbek Sársenbaı.
