Qajyǵumar Shabdanulynyń alty tomdyq «Qylmys» romany jaryq kórdi
Y. Qarashanyń 24-i. QazAqparat /Názıra Eleýhan/ - Búgin Almatyda Qytaıdaǵy qazaq ádebıetiniń klassıgi, belgili saıası qaıratker, shyńjańdyq qandasymyz Qajyǵumar Shabdanulynyń alty tomdyq «Qylmys» romanynyń tusaýkeser rásimi ótti,
dep habarlaıdy QazAqparat.
Atalmysh shyǵarma «Atajurt» baspasynan «Áleýmettik mańyzy bar ádebıet túrlerin shyǵarý» baǵdarlamasy boıynsha jaryqqa shyqty.
Ómiriniń 40 jyldaı ýaqytyn abaqtyda ótkizgen jazýshy búginde 85 jastan asyp otyr. Alaıda, qalamy qolynan túspeı, qazaq ádebıetiniń damýyna aıtarlyqtaı úlesin qosyp kele jatqan qalamger Qytaı Halyq Respýblıkasynda «saıası qylmysker» atanǵan. Búgingi kúni qazaq qoǵamynda Qajyǵumar Shabdanulynyń shyǵarmalaryna degen suranys úlken. Súıinshi danany Dúnıejúzi qazaqtary qaýymdastyǵy Tóraǵasynyń birinshi orynbasary Talǵat Mamashev roman avtorynyń qyzy Gúljaınar Qajyǵumarqyzyna tabystady.
«Búgin qazaq mádenıetindegi úlken oqıǵanyń kýási bolyp otyrmyz. Kóp tomdyq romannyń kindigi túrmede kesildi. Bul - Shyńjań qazaǵynyń jarty ǵasyrlyq tarıhyn qamtıtyn, Qytaıda ómir súrip jatqan qazaq ultynyń taǵdyrynan syr shertetin epopeıalyq shyǵarma. Kitaptarda 30-80 jyldar aralyqtaryndaǵy Qytaı elinde bolǵan oqıǵalardyń barlyǵy qamtylǵan. Taǵy bir ereksheligi, tergeýshige jaýap retinde «Myń bir tún» ertegi formasynda jazylǵan», dedi Qazaqstannyń Halyq jazýshysy Qabdesh Jumádil.
Dúnıejúzi qazaqtary qaýymdastyǵy Tóraǵasynyń birinshi orynbasary Talǵat Mamashevtiń aıtýynsha, 6 tomdyq romannyń daıyndalýy men qalyń oqyrman qaýymǵa jol tartýyna Qazaqstannyń Halyq jazýshysy Qabdesh Jumádildiń sińirgen eńbegi orasan zor. Óıtkeni ol tóte jazýmen jazylǵan qoljazbany kırılıtsaǵa túsirtken, baspaǵa daıyndaǵan.
Saıası qylmysker retinde túrmege jabylǵan avtordyń eki kitaby bostandyqta, qalǵan tórt kitaby temir tordyń ar jaǵynda otyrǵan kezinde jazylǵan. Qazaqstanda birinshi ret tolyq jarııalanyp otyrǵan avtordyń alǵashqy eki kitaby «Qylmys» (1 tom, 2005j.) jáne «Pana» romandary (2004 j.) da alǵash «Atajurt» baspasynan shyqqan bolatyn.
