Qajyǵumar Shabdanulynyń 6 tomdyq “Qylmys” romany Memlekettik syılyqqa usynyldy
ALMATY. Qańtardyń 27-si. QazAqparat /Erlik Erjanuly/ - Qajyǵumar Shabdanulynyń taǵdyry búkil qazaqtyń taǵdyrynyń aınasy ispettes. Búgin Almatyda belgili jazýshy, aqyn, dramatýrg Qajyǵumar Shabdanulynyń 6 tomdyq "Qylmys" romanyn Mádenı saıasat jáne ónertaný ınstıtýtynyń atynan Qazaqstannyń Memlekettik syılyǵyna usyný týraly baspasóz máslıhatynda osylaı aıtyldy,
dep habarlaıdy QazAqparat.
"Q. Shabdanulynyń kitabyn oqyp otyrǵan kezde 20-shy ǵasyrdaǵy qazaqtyń alqakól sulamasyn anyq kóremiz. Bul kisiniń taǵdyryna qatysty máseleni kóterip júrgen Qabdesh aǵamyzǵa, "Jas Alash" gazetiniń ujymyna ózimizdiń rızashylyǵymyzdy bildiremiz. Qazirgi tańda Jazýshylar odaǵy da osy máseleni ózektendirip jatyr. Otanyn ańsap júrgen adamǵa osyndaı memlekettik syılyq berý zańdy dep oılaımyz. Ultty ulttyq qundylyqtar men mádenı-gýmanıtarlyq qundylyqtar aıasynda toptastyrý ıdeıasy bolý kerek", deıdi Mádenı saıasat jáne ónertaný ınstıtýtynyń dırektory Erlan Saıyrov. Onyń aıtýynsha, qazaq ádebıetinde úlken qubylys bolǵan "Qylmys" romanynyń 6 tomy rásimdelip ınstıtýt atynan Mádenıet jáne aqparat mınıstrligine jiberildi. Jalpy alǵashqy eki tomy Qytaıda jaryq kórgen bul shyǵarmasy úshin jazýshyǵa 2000 jyly Qazaqstan Jazýshylar odaǵy halyqaralyq "Alash" syılyǵyn bergen bolatyn. 2005 jyly Dúnıejúzi qaýymdastyǵy janyndaǵy "Atajurt" baspasynan onyń alǵashqy tomyn shyǵarǵan edi. Bıyl onda Mádenıet jáne aqparat mınıstrliginiń qoldaýymen romannyń 6 tomy tolyqtaı jaryq kórip, oqyrmannyń izdep oqıtyn súıikti kitabyna aınaldy.
