QAJK: Azaptaýdyń aldyn alý úshin Qazaqstandaǵy túrmeler kenetten tekserilip jatyr

NUR-SULTAN. QazAqparat – QR ІІM Qylmystyq-atqarý júıesi komıteti tóraǵasynyń birinshi orynbasary Teńizjan Jánibekov túrmelerdegi azaptaý jaǵdaılarynyń aldyn alý úshin qandaı sharalar qolǵa alynyp jatqanyn aıtyp berdi, dep habarlaıdy QazAqparat tilshisi.

«Biz jaǵdaılardyń qaıtalanbaýy úshin (túrmedegi azaptaý) birshama is-shara júrgizip jatyrmyz. Kenetten tekserý (túrmelerge) uıymdastyrylady. Beınebaqylaý júıesi bar. Qarajattyń bólinýine baılanysty bıyldyń ózinde 31 túzeý mekemeniń qyzmetkerleriniń keýdesine beınebaqylaý kamerasyn (vıdeojeton) taqtyq. Ár mekemede óz beınebaqylaý júıesi bar», - dedi ol.

Habarlanyp otyrǵandaı, qazirgi tańda Qazaqstan aýmaǵyndaǵy 82 túzeý mekemesindegi qyzmetkerlerdiń keýdesine 1 363 vıdeojeton taǵylǵan. Jyldyń sońyna deıin taǵy 635 vıdeojeton taǵylady.

«2020-2022 jylǵa qaraı da vıdeojetonmen tolyq qamtý úshin bıýdjetke ótinish joldaımyz. Túrmelerdegi tártipti nyǵaıtý úshin qyzmetkerlerdiń jumysy qatań baqylaýǵa alynatyn bolady», - dedi QAJK tóraǵasy Darhan Qanatbekov.

Onyń aıtýynsha, Qazaqstan túrmelerindegi adam sany 100 myńnan 29 myńǵa azaıǵan.

Eske sala ketsek, buǵan deıin áleýmettik jelilerde formadaǵy adamdardyń tutqynǵa jábir kórsetýi týraly vıdeo taraǵan edi. Almaty oblysynda bolǵan oqıǵanyń beınejazbasy qoǵam narazylyǵyn týdyrdy.

Aqyry, Almaty oblysyndaǵy LA-155/8 mekemesinde sottalǵandardy azaptaǵan qyzmetkerler jaýapkershilikke tartyldy. Kolonııa basshylyǵy jumystan ketti.