QAJK Almatyda sottalǵan kásipkerdiń saýda ortalyǵynda júrgeni týraly aqparatqa túsinik berdi

ALMATY. KAZINFORM — Áleýmettik jelilerde 10 jylǵa bas bostandyǵynan aıyrylǵan kásipker Іlııas Kar Almatydaǵy saýda oıyn-saýyq ortalyqtarynyń birinde júrgeni týraly aqparat tarady. 

Qylmystyq-atqarý júıesi komıtetiniń habarlaýynsha, ol sot úkimimen qaýipsizdigi tómen mekemede (qonys kolonııasy) jazasyn óteý úshin 10 jylǵa bas bostandyǵynan aıyrylǵan.

— Qylmystyq-atqarý kodeksiniń 113-babyna sáıkes, qonys kolonııasynda jazasyn ótep jatqan sottalǵandarǵa zańda kózdelgen jaǵdaılarda (jumysqa ornalasý, demalys, densaýlyǵy) mekemeden tys jerge shyǵýǵa ruqsat beriledi. Sottalǵan adamnyń jeke ótinishine sáıkes, oǵan mekemeden tys jerge shyǵý quqyǵymen demalys berildi. Demalys kezeńinde eshqandaı quqyqbuzýshylyqqa jol bergen joq, — delingen Komıtettiń baspasóz qyzmeti taratqan aqparatta.

Vedomstvonyń málimetinshe, demalys kezinde er adam ishki ister organdary qyzmetkerleriniń baqylaýynda bolǵan jáne qazirgi ýaqytta mekemege oralǵan.

Eske salaıyq, 2018 jylǵy 29 jeltoqsanda Abaı men Seıfýllın qıylysynda jol apaty bolyp, úsh adam qaza tapqan edi. Olardyń arasynda aktrısa Sholpan Elgezekova bar.

Onyń qurbysy, aktrısa Aızada Satybaldıeva ǵana aman qalǵan.

Kýágerlerdiń aıtýynsha, Gelandewagen kóliginiń júrgizýshisi joǵary jyldamdyqpen qyzyl túske ótip ketip, jasyl janǵanda qozǵala bastaǵan kólikke soqtyǵysqan. Apattan keıin kináli oqıǵa ornynan qashyp ketýge tyrysqan. Keıin onyń mas bolǵany anyqtaldy.

Ol Іlııas Kar bolyp shyqty.

Aıyptalýshy Іlııas Kar 2019 jylǵy 12 aqpanda sot aldynda jaýap berdi. Keıin ol apattyń mán-jaıyn aıtyp bergen.

Sot Іlııas Kardy 10 jylǵa bas bostandyǵynan aıyrdy.