Qajymuqannyń qanjary Ulttyq mýzeı qoryna tabystaldy
Búgin qazaq tarıhyndaǵy tuńǵysh kásipqoı balýan Qajymuqan Muńaıtpasulyna tıesili «Djambııa» qanjary QR Ulttyq mýzeıiniń qoryna saltanatty jaǵdaıda tapsyryldy, dep habarlaıdy Kazinform.
Qanjardy saltanatty tabystaý rásimine QR Mádenıet jáne aqparat vıtse-mınıstri Arman Júdebaev, QR Parlamenti Májilisiniń depýtaty Ardaq Nazarov, Qajymuqan Muńaıtpasovtyń shóberesi Áıken Muqanova jáne basqalar qatysty.
«Búgin mýzeı qory qundylyǵy joǵary eksponatpen tolyǵaıyn dep otyr. Bul – kúlli álem moıyndaǵan kúsh atasy, qazaq tarıhyndaǵy tuńǵysh kásipqoı balýan Qajymuqan Muńaıtpasuly tıesili «Djambııa» qanjary. Bir jaǵynan Djambııa qanjarynyń ózi qolóner týyndysy retinde qundylyǵy joǵary bolsa, al ony arab ustalarynyń Qajymuqanǵa arnaıy jasaýynyń ózi arab, túrki áleminiń balýanǵa degen joǵary qurmeti dep bilemiz», - dedi QR Mádenıet jáne aqparat vıtse-mınıstri Arman Júdebaev.
«Djambııa» qanjary júziniń eki jaǵynda arab áripterimen kóne túrik-osman tilinde jazylǵan mátinder bar: sol jaǵynda «kúshti, jeńilmeıtin Muńaıtpasuly Muqanǵa», al oń jaǵynda «Bizden, qajylyqtan estelik, Shaǵyr pasha, 1330 jyl» (Hıjra jyl esepteýi boıynsha 1330 jyl bul qazirgi jyl sanaýyna sáıkes 1912 jyl).
Sonymen qatar, shara barysynda Ulttyq mýzeı qoryndaǵy Q.Muńaıtpasulyna tıesili jádigerlerden kórme uıymdastyryldy. Búgingi kúni mýzeı qory qanjarmen tolyǵyp, balýanǵa qatysty jádigerler sany 27-ge jetti.
