Qajymuqan stadıonyndaǵy jemqorlyq: Para alǵan sheneýnikter 5 jylǵa deıin jaza aldy
Astanada memlekettik organdardyń basshylary jemqorlyǵy úshin sottaldy, dep habarlaıdy Kazınform agenttigi.
Astana qalasynyń qylmystyq ister jónindegi aýdanaralyq soty para alǵan birneshe basshyǵa úkim shyǵardy (QR QK 366-baby):
- Astana TJD basqarmasynyń bastyǵy B. Beısenqanov 5 jylǵa bas bostandyǵynan aıyrýǵa;
- qurylys basqarmasynyń basshysy A. Janǵaskanov 4,5 jylǵa bas bostandyǵynan aıyrýǵa;
- ishki memlekettik aýdıt departamenti basshysynyń orynbasary Ǵ. Aıtjanova 60 mln teńge aıyppulǵa;
- ІMAD bas mamany A. Ábisheva 90 mln teńge aıyppulǵa sottaldy.
Laýazymdyq ókilettigin asyra paıdalanǵan (QR QK 361-baby) Astana qurylys basqarmasy basshysynyń orynbasary J. Myrzahmetovtyń 4 jylǵa bas bostandyǵy shekteldi.
Atalǵan adamdar memlekettik qyzmet atqarý quqyǵynan ómir boıyna aıyryldy.
TJD basqarma bastyǵy Qajymuqan Muńaıtpasuly atyndaǵy ortalyq stadıondy apatty dep taný týraly qujattamany keliskeni úshin qurylys kompanııasy ókilinen 5 mln teńge somasynda para aldy dep aıyptalǵan.
Basshynyń orynbasary jáne ІMAD bas mamany aýdıtorlyq tekserý boıynsha oń qorytyndy úshin jeke kompanııa ókilderinen 2 mln teńge somasynda para aldy dep aıyptaldy.
Astana qalasy qurylys basqarmasynyń basshysy men onyń orynbasaryna laýazymdyq ókilettigin asyra paıdalanǵany úshin aıyp taǵyldy.
Olar qurylys kompanııasyn 21 mln teńgeden astam somaǵa materıaldyq qundylyqtardy satyp alýǵa kóndirgen.
Sondaı-aq, qurylys basqarmasynyń basshysy jalpy qamqorlyǵy jáne memlekettik satyp alý sharttary boıynsha oryndalǵan jumystar aktilerine kedergisiz qol qoıǵany úshin JShS basshylyǵynan 400 myń teńge somasynda para aldy dep aıyptaldy.
Osy úkimmen jeke qurylys kompanııasynyń ókilderi joǵaryda atalǵan barlyq laýazymdy tulǵalarǵa para bergeni úshin jalpy somasy 500 mln teńgege jýyq aıyppul salýǵa sottaldy.
QR QK 41-babyna sáıkes aıyppul belgilengen merzimde tólenbegen jaǵdaıda jaza sharasy bas bostandyǵynan aıyrýǵa aýystyrylady.
Sot úkimi zańdy kúshine engen joq.
