«Qajymuqan» fılmi Italııadaǵy festıvalda birneshe júlde aldy
ASTANA. KAZINFORM — QR Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen «Qajymuqan» fılmi Italııada ótken XXIX Halyqaralyq IPAAF – Apoxiomeno kınofestıvalinde bıikten kórindi.
Vedomstvonyń dereginshe, kartına festıvaldiń basty marapattaryn jeńip alǵan. Atap aıtsaq, «Úzdik fılm», «Eń úzdik er adam róli» (Erbol Tólepbergen), «Úzdik rejıssýra» (Qanaǵat Mustafın) jáne «Úzdik stsenarıı» (Qanaǵat Mustafın, Janat Qasabekov) nomınatsııasyn ıelendi.
Fılm rejısseri Qanaǵat Mustafın tarıhı fılm stsenarııine 2012 jyly kirisken. 2020 jyly túsirilimin bastap, on jyldan astam ýaqyt zertteý júrgizgen. Sonyń nátıjesinde týyndy ótken jyly úlken ekranǵa usynylyp, prokatqa shyqty.
Qajymuqan Muńaıtpasov – frantsýz kúresinen álem chempıony atanǵan tuńǵysh qazaq. Ol álemdik, óńirlik, reseılik, keıin Búkilodaqtyq sýper aýyr salmaqtaǵy klassıkalyq kúres chempıonattarynyń birneshe dúrkin jeńimpazy atanǵan. Balýan óziniń sporttyq mansabynda elýge jýyq medal men marapatqa ıe bolyp, ult maqtanyshyna aınaldy.
Aıta keteıik, IPAAF-Apoxiomeno festıvali 30 jylǵa jýyq uıymdastyrylyp keledi. Italııada ótetin bedeldi halyqaralyq kınofestıval jyl saıyn kıno, óner jáne mádenıet salasyndaǵy úzdik týyndylardy marapattaıdy. Festıval ásirese áleýmettik mańyzy bar taqyryptardy qozǵaıtyn, kórkemdik deńgeıi joǵary jáne mádenı damýǵa yqpal etetin shyǵarmalarǵa basa nazar aýdarady. Ár jyldary bul festıvalde álemniń túkpir-túkpirinen kelgen kórnekti óner qaıratkerleri jeńimpaz atanǵan.
Eske sala keteıik, ótken jyldyń 10 qazanynan bastap elimizdiń barlyq kınoteatrlarynda «Qajymuqan» fılmi kórsetilgen bolatyn. Fılm rejısseri Qanaǵat Mustafın tarıhı fılm stsenarııine 2012 jyly kirisip, 2020 jyly túsirilimin bastap, 10 jyldan astam ýaqyt zertteý júrgizip, úlken ekranǵa usynǵan edi.