Qajylyqqa baılanysty alaıaqtyq: Týrfırma basshysy ımam bolyp jumys istegen be
ALMATY. KAZINFORM - Almatyda qajylyqqa baılanysty 180 adamdy aldaǵan kúdiktige baılanysty tergeý júrip jatyr.
Birneshe kún buryn Almaty qalasynyń polıtsııasy alaıaqtyq isine baılanysty Almaty oblysynyń turǵyny ustalǵanyn habarlady. Departament málimetinshe, kúdikti ózin «Jazera travel» týrıstik fırmasynyń basshysy retinde tanystyryp, qajylyqqa jóneltý boıynsha qyzmet kórsetetin jalǵan kelisimsharttar jasaǵan.
- Aldyn ala málimet boıynsha, kúdiktige keminde tórt adam kómektesken. Olardyń árqaısysynyń áreketine quqyqtyq baǵa beriletin bolady. Kúdikti qamaýǵa alyndy. Qylmystyq is alaıaqtyq deregi boıynsha tergelip jatyr, - habarlady qalalyq PD baspasóz qyzmeti.
Bul jaǵdaıǵa baılanysty Qazaqstan musylmandary dinı basqarmasy resmı málimdeme jasady. QMDB málimetinshe, «Jazera travel» kompanııasynyń basshysy Meıirjan Yryskeldi eshqandaı dinı qyzmet atqarmaǵan jáne meshitte naıb ımam bolyp jumys istemeıdi.
- Almaty oblysynyń Іle aýdanyndaǵy «Sábdenuly Ótegen batyr» meshitiniń naıb ımamy Marsel Tamashbekovke «Jazera travel» kompanııasynyń basshysy Meıirjan Baýyruly umra saparyna nıet etken jandarǵa dáris ótip berý jóninde ótinish jasaǵan. Naıb ımam dinı qulshylyqty túsindirý maqsatynda ótinishterin qabyl alyp, eki ret sabaq ótkizgen. Dáris sońy suraq-jaýap negizinde jalǵasyp, naıb ımam «Jazera travel» kompanııasynyń qyzmeti jaıly bilgen aqparattarymen de bólisken. «Jazera travel» kompanııasyna qatysty daýly másele quqyq qorǵaý organdary tarapynan tekserilip jatyr. Naıb ımamnyń atalmysh máselege qatysy bar-joǵy anyqtalý ústinde, - delingen QMBD málimdemesinde.
Sondaı-aq Qazaqstan musylmandary dinı basqarmasy umraǵa aparýshy týrfırmalardyń qyzmetin qadaǵalaýǵa Dinı basqarmanyń zańdy quzireti joq ekenin habarlady. Basqarma jaýabyna sáıkes, umraǵa baratyn azamattarǵa qyzmet kórsetý, olardyń qaýipsizdigin qamtamasyz etý atalmysh týrfırmalar jaýapkershiliginde.
- QR syrtqy týrızmdi retteıtin tıisti zańnamasyna saı umra saparyn toppen uıymdastyrý úshin mindetti túrde memlekettik lıtsenzııasy bolýy tıis jáne ár umra jasaýshyǵa týroperator tarapynan týrkod berilýi qajet. Mundaı talaptar oryndalmaǵan jaǵdaıda umrany toppen uıymdastyrý QR zańdaryna qaıshy. Osy rette umraǵa aparýshy týrfırmalardyń qyzmetin qadaǵalaýǵa Dinı basqarmanyń zańdy quzireti joq ekenin jetkizemiz. Sonymen qatar otandastarymyzdy resmı týroperatorlyq lıtsenzııasy joq týrkompanııalarmen umra saparyna barmaýǵa shaqyramyz, - dep málimdedi QMDB.
Eske salaıyq, buǵan deıin ІІM sheteldegi qazaqstandyqtarǵa alaıaqtyqtyń jańa túri týraly eskertkenin jazǵanbyz.