Qajylyqqa barǵan 4 myń qazaqstandyqtyń barlyǵy elge oraldy
ASTANA. KAZINFORM — Saýd Arabııasy Koroldiginiń Jıdda qalasynan qazaqstandyq qajylardy alyp shyqqan sońǵy áýe reısi Qazaqstanǵa aman-esen qondy. Osylaısha qasıetti qajylyq saparyna attanǵan 4000 otandasymyzdyń barlyǵy týǵan jerge tolyq oraldy. Bul týraly QMDB málim etti.
Qajylar qasıetti Mekke jáne Mádına qalalarynda bolyp, Islam dininiń bes paryzynyń biri sanalatyn qajylyq qulshylyǵyn oryndady. Sonymen qatar qos qasıetti mekendegi tarıhı jáne dinı mańyzy bar zııarat oryndaryn aralady.
— Qajylyq maýsymy barysynda Qazaqstan qajylyq mıssııasy qajylarǵa dinı, medıtsınalyq jáne uıymdastyrýshylyq baǵyttar boıynsha jan-jaqty qyzmet kórsetti. Sondaı-aq qajylyq saparyn uıymdastyrýshy konkýrstan ótken 14 týroperator mıssııamen birlese otyryp, otandastarymyzdyń qaýipsizdigi men qulshylyq rásimderin talapqa saı oryndaýyna turaqty qyzmet kórsetti, — delingen habarlamada.
Bıylǵy qajylyq maýsymy joǵary deńgeıde uıymdastyrylyp, qazaqstandyq qajylar qasıetti sapardaǵy paryzdaryn tolyq ári abyroımen oryndap, elge aman-esen oraldy.
Qazaqstan qajylyq mıssııasy qajylyq maýsymynyń tabysty ótýine úles qosqan Saýd Arabııasy Koroldiginiń Qajylyq jáne umra mınıstrligine, Qazaqstan Respýblıkasynyń Saýd Arabııasyndaǵy Elshiligine, qajylyq mıssııasy quramyndaǵy mamandarǵa, qajylyq saparyn uıymdastyrǵan týroperatorlarǵa jáne barsha qajylarǵa alǵysyn bildiredi.
Aıta keteıik, buǵan deıin Saýd Arabııasynda shetelden 1,5 mln-nan astam adam qatysyp otyrǵan jyl saıynǵy qajylyq ótip jatqanyn jazdyq.
Saýd Arabııasy qajylyq qarsańynda Mekkege kirýge qatysty jańa talaptardy jarııalady.
