Qajylyq-2026: Saýd Arabııasy ekologııalyq sharalardy kúsheıtip jatyr
ASTANA. KAZINFORM – Saýd Arabııasy qajylyq maýsymy kezinde ekologııalyq júktemeni azaıtý sharalaryn kúsheıtip jatyr, dep habarlaıdy Agenzia Nova agenttigi.
Bıyl Mekke qalasyna jasalatyn dástúrli qajylyqqa álemniń túkpir-túkpirinen 1,6 mıllıonnan astam musylman keledi dep kútilip otyr. Koroldik bılik qaldyqtardy basqarýǵa, aptap ystyqtyń saldaryn azaıtýǵa, elektr kóligin damytýǵa jáne tsıfrlyq sheshimderdi engizýge erekshe nazar aýdaryp otyr.
Ekologııa salasyndaǵy negizgi máselelerdiń biri – qaldyqtar. Saýd Arabııasynyń Qaldyqtardy basqarý jónindegi ulttyq ortalyǵynyń málimetinshe, byltyrǵy qajylyq maýsymda 348 myń tonnadan astam qoqys jınalǵan.
Osyǵan baılanysty bılik qaldyqtardy jınaý jáne qaıta óńdeý jumystaryn kúsheıtip jatyr. Bul iske kommertsııalyq emes uıymdar men eriktiler de tartylǵan.
Taǵy bir kúrdeli másele – aptap ystyq. Saýd Arabııasynyń Ulttyq meteorologııalyq ortalyǵynyń boljamynsha, qajylyq kezeńinde Mekke men qasıetti oryndardaǵy aýa temperatýrasy 47 gradýsqa deıin jetýi múmkin.
Eldiń Densaýlyq saqtaý mınıstrligi qajylardy kún ótý men sýsyzdaný qaýpin azaıtý úshin qolshatyr paıdalanýǵa shaqyrdy. Bılik málimetinshe, kóleńkede bolý seziletin temperatýrany 10 gradýsqa deıin tómendetýi múmkin.
Qajylardy ystyqtan qorǵaý úshin sońǵy jyldary qajylyq ótetin aımaqtarǵa alty myńnan astam sý búrikkish ornatylyp, kóleńkeli aýmaqtar keńeıtildi. Sondaı-aq asfalttyń qyzýyn azaıtatyn arnaıy jabyn tóselgen.
Densaýlyq saqtaý salasynda da shuǵyl áreket etý júıesi kúsheıtildi. Qajylyq kezinde úsh myńnan astam jedel járdem kóligi, onyń ishinde mototsıklder, elektrli golf-karlar jáne 11 sanıtarlyq tikushaq paıdalanylady.
Sonymen qatar medıtsınalyq quraldardy jedel jetkizýge arnalǵan drondar men patsıentterdi tsıfrlyq suryptaý júıeleri synaqtan ótkizilip jatyr.
Ekologııalyq strategııanyń mańyzdy baǵyttarynyń biri – kólik ınfraqurylymyn damytý. Al-Mashaer elektr poıyzy Mına, Mýzdalıfa jáne Arafat aımaqtaryn baılanystyryp, qajylyq kezinde eki mıllıonnan astam jolaýshy tasymaldaı alady.
Uzyndyǵy 18 shaqyrym bolatyn jeli toǵyz stantsııadan turady. Onyń ótkizý qabileti saǵatyna shamamen 72 myń jolaýshyǵa jetedi.
Temirjol júıesiniń iske qosylýy qasıetti oryndarǵa jyl saıyn jasalatyn shamamen 50 myń avtobýs reısin qysqartýǵa múmkindik berdi. Bul kólik júktemesi men zııandy shyǵaryndylardy azaıtty.
Budan bólek, qajylardy Mekke, Mádına jáne rásim ótetin aımaqtar arasynda tasymaldaý úshin segiz myńnan astam avtobýs paıdalanylady.
Buǵan deıin Saýd Arabııasynyń qajylyq maýsymynda medıtsınalyq qyzmet salasyndaǵy baqylaýdy kúsheıtkeni habarlandy.
Al bıyl 4000 otandasymyz qajylyq paryzyn óteıtinin jazdyq.
