«Qajet taksı» platformasyna 317 myń adam tirkelgen
ASTANA. KAZINFORM — Qazaqstandyq «Qajet taksı» platformasyna iske qosylǵan alǵashqy aptanyń ózinde 317 myń adam tirkelgen. Qazir servıs elimizdiń 30-dan astam qalasynda jumys isteıdi. Jobanyń basty ereksheligi — júrgizýshilerden ár sapar úshin komıssııa alynbaıdy.
Bul týraly «Qajet taksı» jobasynyń strategııalyq dırektory Sadyq Sherimbek «Jibek Joly» telearnasynyń «Búgin.LIVE» baǵdarlamasynda aıtty.
Onyń sózinshe, platformada qazir 36 myńǵa jýyq júrgizýshi verıfıkatsııadan ótip, rastalǵan. Al tirkelýge ótinish bergen júrgizýshilerdiń sany 70 myńǵa jýyqtaǵan. Qujattardy tekserý jumystary áli de jalǵasyp jatyr.
Taksı servısi bastapqyda aýyl turǵyndarynyń qajettiliginen týyndaǵan eken.
Kompanııa ókilderi Qapal aýylyna arnap jeke taksı qyzmetin jasaǵan. Keıin joba aýqymy keńeıip, platformany búkil Qazaqstanǵa usyný týraly sheshim qabyldanǵan.
— Alǵashynda «Qapal taksı» servısin aýyl turǵyndaryna arnap iske qostyq. Keıin bul jobany búkil Qazaqstanǵa usynýdy jón kórdik. Halyqtyń ıgiligine jarasyn degen maqsat boldy, — dedi Sadyq Sherimbek.
Onyń aıtýynsha, platformany iske qosqan alǵashqy kúnderi tapsyrys sany kúrt ósken. Bir kúnde 120 myń adam kólikke tapsyrys bergen.
— Alǵashqy kúnderi tapsyrys óte kóp boldy. Bir kúnniń ishinde 120 myń adam kólikke tapsyrys bergen kez boldy. Olardyń 70-80 paıyzy servısti tekserip kórgisi kelgen adamdar dep esepteımiz. Sol kezde kólik jetispegen sátter de boldy. Qazir kúndelikti tapsyrys sany 40 myńǵa jetip otyr. Onyń ishinde kúnine 10 myńǵa jýyq tapsyrys tolyq oryndalady, — dedi ol.
Júrgizýshilerden komıssııa alynbaıdy
Joba ókiliniń aıtýynsha, platformanyń bıznes-modeli basqa agregatorlardan ózgeshe. Servıs ár sapardan komıssııa almaıdy.
— Biz árbir sapardan aqsha almaımyz. Bolashaqta platformany paıdalanǵany úshin on kúnde nemese aıyna bir ret belgili bir soma alýdy qarastyryp otyrmyz. Bul tólem qazirgi sheteldik agregatorlar alatyn somadan 70-80 ese tómen bolady dep josparlap otyrmyz, — dedi Sadyq Sherimbek.
Spıker sózinshe, Qazaqstanda taksı júrgizýshisi bolyp shamamen 500 myń adam jumys isteıdi. Sondyqtan ózimizdiń otandyq qyzmettiń sapasyn arttyryp, odan ári damytý kózdelip otyr. Bul taksı qyzmetinde jumys isteıtin azamattar tabysynyń edáýir bóligi óz qaltalarynda qaldyryp, tabysyn da arttyrady.
Sondaı-aq Sadyq Sherimbek Jasandy ıntellekt jáne tsıfrlyq damý mınıstri Jaslan Mádıevpen kezdesý ótkenin aıtty. Kezdesýde platformany damytýǵa qatysty bes másele talqylanyp, olardy sheshý boıynsha qoldaý kórsetilgen.
Júrgizýshilerdi tekserý júıesi engiziledi
Platformada júrgizýshilerdiń qujattary avtomattandyrylǵan jasandy ıntellekt júıesi men mamandardyń qatysýy arqyly tekseriledi.
Budan bólek, kompanııa júrgizýshilerdi Іshki ister organdarynyń júıeleri arqyly verıfıkatsııalaý tetigin jolǵa qoıyp jatyr.
Jolaýshylardyń qaýipsizdigin qamtamasyz etý úshin áıelderge arnalǵan «Qurby» tarıfi de iske qosylǵan. Bul tarıf boıynsha tapsyrysqa áıel júrgizýshi keledi.
— Qyz-kelinshekter men otbasylardyń qaýipsizdigin qamtamasyz etý maqsatynda «Qurby» tarıfin qostyq. Mysaly, ata-analar qyzdaryn bir jerge jibergende nemese áıelin taksımen jolǵa shyǵarǵanda, olardyń ózin qaýipsiz sezingenin qalaımyz, — dedi joba dırektory.
Onyń aıtýynsha, eger «Qurby» tarıfin er adam tańdap qoısa, áıel júrgizýshiniń tapsyrysty qabyldamaýǵa quqyǵy bar. Qazir platformaǵa áıel júrgizýshiler de tirkelip jatyr.
Aıta keteıik, jaqynda Qazaqstanda taksımen 174 mıllıonnan astam jolaýshy saparlaǵanyn jazǵan edik.
