Qajet bolsa halyqaralyq sport trıbýnalyna deıin baramyz – UOK Azıadadaǵy keleńsizdikter týraly
QR Ulttyq Olımpıada komıteti Qytaıdyń Hanchjoý qalasynda ótken jazǵy Azııa oıyndary jóninde baspasóz konferentsııasynda aıtýly sport sharasynda bolǵan keleńsizdikterge qatysty pikir bildirdi, dep habarlaıdy QazAqparat.
QR UOK bas hatshysy Andreı Krıýkov Qazaqstan ulttyq qurama komandasynyń músheleri – boksshylar Aslanbek Shymbergenov pen Karına Ibragımovaǵa qatysty ister týraly aqparat berdi.
«Ókinishke oraı, Hanchjoýda qazaqstandyq boksshylardyń quqyqtarynyń buzylýy múmkin jaǵdaılar oryn aldy. QR Ulttyq Olımpıadalyq komıteti Týrızm jáne sport mınıstrligimen, sondaı-aq, Qazaqstan boks federatsııasymen birlesip, atalǵan jaǵdaıda baılanysty qajetti sharalardy qabyldady. Sportshylardyń ózderinen, jattyqtyrýshylarynan suraý alyndy, federatsııa mamandarymen jáne táýelsiz sarapshylarmen, zańgerlermen Aslanbek Shymbergenovtiń jekpe-jeginen keıin birden keńes júrgizildi. Bul jarystarda jekpe-jekterdi resmı qaıta qaraý rásimi bolmaǵandyqtan, bizdiń oıymyzsha, sportshylar tóreshilerdiń sheshimderine resmı túrde shaǵymdaný quqyǵynan aıyrylǵan, bul Azııa olımpıada keńesiniń erejeleri men Olımpıada Hartııasynda jazylǵan. Apellıatsııalyq tehnıkalyq qazylar alqasy qurylmaǵan, rásim PBU erejelerinde qarastyrylmaǵan (HOK-tyń Parıj-2024 bokstaǵy jumys toby). Biz Halyqaralyq olımpıadalyq komıtet pen Azııa Olımpıada keńesine tıisti shaǵymdardy joldadyq, olar qazirgi ýaqytta qaralyp jatyr. Munda bokstyń tehnıkalyq máseleleri ǵana emes, quqyqtyq tártip pen sportshylar quqyqtaryn buzý máseleleri de qozǵalǵandyqtan, bizdiń talaptarymyzǵa jaýap daıyndaý tetigi zańdy turǵydan kúrdeli jáne birshama ýaqytty qajet etedi. HOK pen Azııa keńesinen alynǵan sheshimderdiń nátıjeleri boıynsha biz qajet bolǵan jaǵdaıda ári qaraıǵy halyqaralyq sport trıbýnalyna júginý týraly sheshim qabyldaımyz», - dedi Andreı Krıýkov.
QR UOK tóreshilerdiń sýbektıvtiligi, boks stılderiniń qaqtyǵysy týraly áńgimeler, jeke janashyrlyq jekpe-jektiń sońǵy esebine áser etpeýi kerektigin aıtýda. HOK umtylatyn basty qaǵıda – taza boks bolýy kerek, Qazaqstan mundaı tásildi tolyǵymen qoldaıdy.
Jekpe-jekti baǵalaý krıterııleri PBU boks erejelerinde naqty kórsetilgen. Eger erejelerdiń shynymen buzylýyna jol berilse, apellıatsııalyq alqabıler tıisti sheshim qabyldaýy kerek.
«Ókinishke oraı, Hanchjoýdaǵy barlyq jaǵdaıdy egjeı-tegjeıli taldaı otyryp, kóptegen qarama-qaıshy sátterdi tabýǵa bolady. Jerebe tastaý kezinde naqty irikteý protsedýrasy qoldanylmady, bul óz kezeginde eń myqty boksshylardyń aldyn-ala jekpe-jekte kezdesýine, áıelder boksyna qatysýshylardy genderlik sáıkestendirýdiń naqty erejeleriniń bolmaýyna, tóreshilerdiń kópshiligin bir «bloktan» naqty jekpe-jekke taǵaıyndaý jáne basqa da qaıshylyqtarǵa múmkindik ashty. Bul faktilerdiń barlyǵy boks sarapshylary qaýymdastyǵynda obektıvti kúmán týdyrady», - dep atap ótti Andreı Krıýkov.
Karına Ibragımovanyń sońǵy fınaldyq jekpe-jeginen bir kún buryn QR UOK talabymen Azııa Olımpıadalyq keńesiniń medıtsınalyq komıssııasy shuǵyl shaqyryldy. Komıssııa naqty dálelder alý úshin qajetti is-sharalardy jedel uıymdastyrdy. Mundaı protsedýralardyń nátıjelerin alýǵa, medıtsınalyq uıymdardyń derekterin óńdeýge birshama ýaqyt ketedi. Komıssııa jumysynyń nátıjesi daıyn bolǵanda sheshim qabyldanady, sonyń negizinde qazaqstandyq tarap ári qaraı halyqaralyq sport trıbýnalǵa júginý máselesin sheshpek.
«Týrızm jáne sport mınıstrligimen jáne Qazaqstan boks federatsııasymen birlesip, qoldanystaǵy reglamentke sáıkes bul jumysty quqyqtyq zań aıasynda jalǵastyramyz. Sportshylardyń densaýlyǵy men quqyqtaryn qorǵaý – UOK jumysynyń basty basymdyǵy», - dedi UOK Bas hatshysy Andreı Krıýkov.
Eske sala keteıik, 2023 jyldyń 3 qazanynda bokstan Azııa oıyndarynyń jartylaı fınalynda qazaqstandyq Aslanbek Shymbergenov pen japondyq Sevon Okadzavanyń kezdesýinde – tóreshilerdiń sheshimimen jeńis japon boksshysyna berildi. Bul sarapshylar qaýymdastyǵy men jankúıerlerdiń aralas reaktsııasyn týdyrdy.
Al 2023 jyldyń 5 qazanynda Karına Ibragımova fınalda qytaılyq Taıpeı boksshysy Lın ıÝ Tıngke qarsy shyqty, onyń genderlik sıpatta 2022 jáne 2023 jyldary birneshe pretsedent bolǵan.
